Sereńko 76 - সান্তালী বাইবেল

Isorge jikʼtạuicʼ

¹ Jihudạ rajosṭiren sanamkoge Isorakʼ kathako baḍaea; Israelkoakʼ rajosṭire uniyakʼ ńutum do maraṅokʼtaea.

² Salemre uniyakʼ tạmbu menakʼtaea ar Sionre hõ uniyakʼ tahen oṛakʼ menakʼa.

³ Uni do onḍege jolokʼkan joto sarkoe rạputʼkeda, uni do ḍhal, tarwaṛe ar lạṛhại sajbajko hõe rạputʼ giḍikeda. (Sela)

⁴ Marsalre am do samani jhak jhak! Sendra buru khon amakʼ ruạṛ hijukʼ do samani ṭhonok!

⁵ Jhũk monanko doko siboṛ ocoyena, onko doko jạpitʼ hapekeda; ar joto daṛean hoṛ do ti jaṅga lạbṛukʼen takoa.

⁶ E Jakobren Isor, sadom ar rãtgạḍi cakʼlaoko do amakʼ dhomkao iạteko jạpitʼ hapekeda.

⁷ Am, hẽ amge ạḍi botoranicʼ kanam; amakʼ edre rakapʼlenre okoe hale am samaṅre doe teṅgo daṛeakʼa?

⁸ Serma khon amakʼ bicạr reakʼem ańjom ocokeda; E Isor, am do bicạr lạgitʼgem beretʼena

⁹ dhạrtiren santaokʼkan hoṛko rukhiyạko lạgitʼ; dhạrti do botorte nijhumena. (Sela)

¹⁰ Khạṭige manwakoakʼ raṅgao hõe sarhaomea, ar ona raṅgao reakʼ sarecʼakʼte apnar baṛe sajokʼme.

¹¹ Ape do aperen Probhu Isor ṭhen manotakʼko dohoype ar ona purạuaepe. Ar okoe doe botoranicʼkan uni lạgitʼ sanam disạm khon hoṛko do dan sandesko ạguiyma.

¹² Uni do disạm calaokoakʼ bạḍạiye heseketʼtakoa; ar dhạrtiren rapajko do uniko botoraea.