Sereńko 75 - সান্তালী বাইবেল

Bikʼcạricʼ Isor

¹ E Isor, amle sarhaoetʼmea, ale do amgele sarhaoetʼmea, ente am do sorrege menama; hoṛko do amakʼ hahaṛa kạmi reakʼ kathako lại jạhireda.

² Am dom meneda, “Ṭhik okteń bachao joṅa, ar ińge hok reakʼiń bicạra.

³ Dhạrti ar onare tahenkan sanamkoko cabalenre, ińge ona reakʼ khunṭiko doń ṭikạu dohoya. (Sela)

⁴ Iń do phulạukʼkan koń metakoa, ‘alope gorbokʼa,’ ar bạṛicʼko doń metakoa, ‘dereń do alope rakabtapea.

⁵ Apeakʼ dereń do coṭte alope rakaba ar hoṭokʼ keṭecʼkate hõ alope roṛa.’ ”

⁶ Purub se pạchim se hahaṅkar jaega secʼ khon okoe hõ rukhiyạ lạgitʼ do bako hijukʼa;

⁷ Menkhan Isorgeye bicạra; uni do mitʼhoṛe copotʼedea ar mitʼ hoṛ doe usuledea.

⁸ Probhu Isorakʼ tire mitʼṭecʼ bạṭi menakʼa, onare do mosola mesao akatʼ cãwãoakʼ darkha rasa menakʼa. Uni do ona bạṭi khone dul oḍoka; ar dhạrtiren sanam bedhorom hoṛko ona reakʼ lenda hõ lendako hińjitʼ joṅa arko ńũiya.

⁹ Menkhan iń do jaejug Isor reaṅiń porcara ar Jakobren Isorakʼ iń sarhao sereńaea.

¹⁰ Iń do bedhoromkoakʼ sanam dereńkoń makʼ giḍikakʼa, menkhan Isor botoraekoakʼ dereń doń usul ocoya.