Sereńko 74 - সান্তালী বাইবেল

Disạm rukhiyạkʼ lạgitʼ koejoṅ

¹ E Isor, jaejug lạgitʼ cedakʼem bạgi giḍi akatʼlea? Amakʼ ạtiń ṭạnḍiren bhiḍiko upạrte cedakʼ amakʼ edre reakʼ seṅgel do sarsaokʼ kana?

² Hudiskate ńelme amren onko hoṛkoakʼ katha okoe do sedae khonge amren hoṛem hoyocoakatʼko, okoe bõsrenko do amren ạidạriko lekatem chaḍao ạguletʼko. Disạime ona Sion buru reakʼ katha one okaṭakʼ amakʼ tahen oṛakʼem benao akatʼ.

³ Jaejug reakʼ noa dhaṅdhaseranakʼ secʼ am do taṛam laha hijukʼme; sonot ṭhạ̃ire bạiriko do sanamakʼko jarkhar akada.

⁴ Ar am sãote okarele helmelokʼ kan tahẽkan ona ṭhạ̃ire bạiriko doko hạnḍrạu baṛayeda, onḍe onko do akoakʼ cinhạko dohoakada.

⁵ Ona ńelte nonka bujhạukʼ kana, okoe coṅ gajaṛ reakʼ dare mag lạgitʼ ṭeṅgocʼko epel akada.

⁶ Ṭeṅgocʼ ar hạtuṛte sanam rokʼ kundạu akatʼ kạmiko onko doko dhaṅdhaser caba akada.

⁷ Amakʼ sonot ṭhạ̃ire onko do seṅgelko jonḍi akawada, amakʼ tahen reakʼ ṭhạ̃i hõ hasa sãoteko mesao akatʼte ona doko bhõnḍ akada.

⁸ Onko do mone moneteko menkeda, “Onko do bon sumạrkoa.” Isor saõte helmelokʼ reakʼ sanam jaegako onko doko atar giḍi akada.

⁹ Abo iạte jãhãn hahaṛa kạmi hoyokʼkan nonka do ar babon ńeleda; jãhãn nạbiko hõ ar bạnukʼkoa; nonka baṅ ar tinạkʼ din calakʼ ona do aboren okoe hõ bako baḍaea.

¹⁰ E Isor, bạiriko do ar tinạkʼ dinko landa dhudhutʼa? Jaejugge cetʼ onko do amakʼ ńutumko nindạutama?

¹¹ Cedakʼ amakʼ ti, ona amakʼ jojom ti dom okoyetʼtama? Ona do kokha khon oḍoktam ar onko caba utạrkom.

¹² Enrehõ E Isor, ạd khonge am do ińren raj kanam; amge noa dhạrtire babańcao reakʼem kạmikana.

¹³ Amakʼ daṛetege am do jalapurim bar hạṭiń akada; amge jalapurire dakʼ maṅgaṛkoakʼ bohokʼem gejer akatʼtakoa.

¹⁴ Amge Libiạthan reakʼ bohokʼem gejer akatʼtaea ar uniyakʼ hoṛmo do hahaṅkarren jiwiyankom jom ocoletʼkoa.

¹⁵ Am do jharna ar huḍiń gaḍako reakʼ horem jhicʼ akada; ar jug khon ạtukʼkan gaḍako do amgem ańjetʼ ocoakada.

¹⁶ Siń do amakʼge, hẽ ar ńindạ hõ amakʼge; siń cando, ńindạ cando ar ipilko hõ amgem ṭarhao ocoakatʼkoa.

¹⁷ Dhạrti reakʼ simạnako hõ amgem ṭhik akada; amge rabaṅ din ar lolo dinem hoyocoakada.

¹⁸ E Probhu Isor, alom hiṛińa bạiri do amko landa dhutʼam kana, ar bebujko do amakʼ ńutumko nindạuetʼtama.

¹⁹ Amren nui mala potam do kaṭaha janwarko ṭhen alom soprotea ar am santaokan hoṛkoakʼ jion reakʼ katha do tisge alom hiṛińkakʼa.

²⁰ Amakʼ bondobos reakʼ katha disạime; ar disạm reakʼ sanam oko akan jaegako do behokakʼte perecʼ akana.

²¹ Santao ocokʼkan hoṛ do lajaokate alom ruạṛ ocokoa; nacar ar reṅgecʼko do amakʼ ńutumko sarhaotam ma.

²² E Isor, am do ma beretʼdokʼte bicạr lạgitʼ amakʼ mambla hạjirme; alom hiṛińa bebuj hoṛko do goṭa din amko landa dhutʼam kana.

²³ Amren bạirikoakʼ kạumạu, am upạrte jao okte hoyokʼkan, ona do alom hiṛińa.