Sereńko 73 - সান্তালী বাইবেল

Tesar puthi (Sereńko 73–89) Isorakʼ hok bicạr

¹ Okoeyakʼ ontor khạṭige onko Israelko secʼ Isor do sạrigeye bhạlạiyicʼ kana.

² Menkhan iń doń bhindạṛokʼkan tahẽkana; ar ińakʼ jaṅga do leńjetʼdokʼ kantiń tahẽkana.

³ Ńelkedạń, bedhoromko do ạḍi sukre menakʼkoa, ar onko bạḍại hoṛko ńelte ińakʼ mẽtʼ do jolokʼkan tiń tahẽkana;

⁴ ente gujukʼre onko do baṅ hasokoa ar onkoakʼ hoṛmoko hõ lodgopʼge tahena.

⁵ Eṭakʼ hoṛko cetʼleka muhinreko paṛaokʼ onko do onka bako paṛaokʼa; Eṭakʼko cetʼleka kosṭoko ńam onko do onka kosṭo bako ńama.

⁶ Onate bạḍại do onkoakʼ hoṭokʼ reakʼ mala leka, ar santao do onkoakʼ hoṛmo reakʼ kicricʼ kana.

⁷ Itil iạte onkoakʼ mẽtʼ do lonḍo lonḍo caba akantakoa; onkoakʼ mon reakʼ bạṛicʼ hudisko do sareṛ akana.

⁸ Onkoakʼ kathare do ṭiṭkạri ar hiskạ menakʼa; bạḍạite onko do santao reakʼ botorko udukʼetʼa.

⁹ Onko do serma upạrte kathako roṛa. Ar goṭa dhạrtire onkoakʼ katha do ḍamḍahekʼkana.

¹⁰ Onate Isorren hoṛko do bạṛicʼ horteko ruạṛ calakʼa ar onako katha do ạḍi bạ̃ṛtiko ńũjoṅa.

¹¹ Onkoko mena, “Isor do cekateye baḍaea? Maraṅ Isor ṭhen akel mente cetʼ jãhãnakʼ menakʼa.”

¹² Noko kangeako onko bạṛicʼ hoṛ do okoe do nirdạndi tahẽkate dhon sompottiko ḍheretʼtako.

¹³ Ińakʼ ontor do ạuṛiyakʼge khạṭiń dohoakatʼtińạ, ar ińakʼ ti do ạuṛiyakʼge dhoromiń dohoakada.

¹⁴ Siń sạṭupʼge iń do kosṭoń jomakada; dinạm hilokʼ setakʼ jokhecʼ iń do sạjạiyiń jometʼ tahẽkana.

¹⁵ Noako katha hoṛko ṭheniń menle khan, enḍekhan noa piṛhiren amren hoṛko ṭhen iń do pạtiạranicʼ iń hoykokʼa.

¹⁶ Iń do noako babotre bujhạu reakʼ tinreń kurumuṭukeda unre ińakʼ mon do ona kosṭo emokʼe ehopʼena;

¹⁷ Menkhan tinre iń do Isorakʼ sonot oṛakʼteń calaoena unre onkoakʼ mucạtʼ dosa reakʼ kathań bujhạu ńamkeda.

¹⁸ Onko do sạrige leńjedokʼ jaegarem dohoakatʼkoa ar mohor meṭaokʼ talarem ńurhạ giḍi akatʼkoa.

¹⁹ Onko do acʼkageko maraokʼa ar botoranakʼ muhinreko caba utạrokʼa.

²⁰ Jạpitʼ khon ebhenlenre manwa ṭhen cetʼleka kukmũ do ạuṛiyagokʼ, onkage E Probhu Isor, amem ebhenlenre am ṭhen onko do ạuṛiyakʼko hoyokʼa.

²¹ Ińakʼ mon do tinre haṛhatʼlena ar ontor hõ sobokʼlentińa,

²² unre iń do lelha ar bebujgeń hoylena ar am ṭhen do janwar barag geń tahẽkana.

²³ Enhõ iń do jao ghuṛi am sãorege minạńa; amge ińakʼ jojom tiyem sapʼ akatʼtińạ.

²⁴ Amakʼ solhateyem calaoińạ ar sesre amakʼ ṭhonokreyem ataṅińạ.

²⁵ Sermare ińren sanamakʼ dom amkangea; amiń ńamketʼme iạte dhạrtire ińakʼ jãhãnakʼ khojogokʼakʼ do ar bạnukʼtińạ.

²⁶ Ińakʼ hoṛmo ar mon do sesokʼa, menkhan Isorge ińakʼ ontor reakʼ daṛe do, ar unige ińakʼ jaejugren bakhra kanae.

²⁷ Okoe am ṭhen khon pharakteko sen akan, onko doko ses utạrokʼa; ar okoe amre bako pạtiạu akan onko dom marao giḍikoa.

²⁸ Menkhan Isor tulucʼ iń tahen do bhạlạige; Probhu Isor do ińakʼ aotan gaṛiń hoyoco akadea, jemon uniyakʼ sanam kạmi reakʼ kathań porcar daṛeakʼ.