Sereńko 72 - সান্তালী বাইবেল

Raj lạgitʼ koejoṅ

¹ E Isor, bicạr reakʼ okaṭakʼ ạidạri menakʼtam ona do nui rajge danaeme; nui raj hopon do amakʼ akelge emae me;

² jemon amren hoṛko dhoromteye bicạr daṛeako ar santao ocokʼkanko hõ hok reakʼe bicạrkatako.

³ Uniyakʼ dhorom kạmi talate hoṛko lạgitʼ buru ḍuṅgrikote esetʼakan disạm do bhạlạiyte perejokʼma.

⁴ Uniyakʼ rajosṭiren santao ocokʼkan hoṛko cetanre uni do dhorom reakʼe bicạreda; uni do reṅgecʼkoe bańcaoetʼkoa ar sasantaoko doe chirchạturetʼkoa.

⁵ Tinạkʼ din siń cando ar ńindạ candokin tahen unạkʼ din piṛhike piṛhi hoṛko do uniko botoraea.

⁶ Irakatʼ ghãs goḍare jạṛi dakʼ ńurlenre cetʼleka hoyokʼ onkage uni hõe hoyokʼma; jemon uni do hasae lohotʼ akatʼ dakʼ lekae hoyokʼ.

⁷ Uniyakʼ rajokʼre Isor botoraeko do bạ̃ṛti bhor jemonko ńam; ar tinạkʼ din ńindạ candoe tahen unạkʼ din onkoakʼ jion do bhạlạiyte perejokʼ takoma.

⁸ Uniyakʼ rajosṭi reakʼ simạ do mitʼ jalapuri khon eṭakʼ jalapuri hạbicʼ, Uphreṭis gaḍa khon dhạrti reakʼ mucạtʼ hạbicʼ.

⁹ Hahaṅkarren hoṛko do uni samaṅreko ombagokʼa. Ar uniren bạiriko do uniko ḍobokʼaea.

¹⁰ Tạrsis ar dipkoren rajko do uni khajnako emaema; Sheba ar Sebaren rajko do sandesko samaṅaea.

¹¹ Sanam rajko do uniko ḍobokʼae ma. Ar sanam jạtrenko hõ uniko sewawae ma.

¹² Okoeko reṅgecʼge, arko santao ocokʼkan ar dukhạliạko one goṛo ńam lạgitʼko rakʼetʼkan uni do onkoe bańcaokoa.

¹³ Uni do nandan ar reṅgecʼkoe dayawakoa ar nacarkoe bańcaokoa.

¹⁴ Santao ar khed reakʼ ti khon onkoakʼ jiwiye rukhiyại takoa; uniyakʼ mẽtʼre onkoakʼ mãyãm reakʼ dam do ḍhergea.

¹⁵ Uni do ḍher din jiwetʼe tahenma; Seba disạm reakʼ sona uni ṭhen baṛe hijukʼma. Ar siń sạṭupʼ uni lạgitʼ koejoṅ hoyokʼ ma; ar goṭa dinge uni cetanre bhor baṛe ńurokʼma.

¹⁶ Disạmre ạḍi uṭạr phosolko hoyokʼma, buru reakʼ cuṛạkore hõ ona do hoyokʼma. Khet reakʼ phosolkore do Lebanon bir reakʼ sae sae saḍege rakabokʼma; nagraha khon oḍokʼ hijukʼkan hoṛ do ṭạnḍi reakʼ ghãs leka ḍherko bạḍokʼma.

¹⁷ Uniyakʼ namḍak do jaejug hạbicʼ tahenma; siń cando tinạkʼ din marsale emokʼa unạkʼ din uniyakʼ ńutum tahentae ma. Uni hotete sanam jạtren hoṛ jemon bhorko ńam ma; ar onko do bhạganko metaema.

¹⁸ Probhu Isor, okoe doe Israelkoren Isorkan, uniyakʼge sarhao hoyokʼtae ma; eken unige hahaṛawakʼkoe kạmikana.

¹⁹ Uniyakʼ ṭhonok do jaejug hạbicʼ sarhao hoyokʼtaema; goṭa dhạrti do uniyakʼ ṭhonokte perejokʼ ma. Amen, Amen.

²⁰ Jisạiren hopon Dạudakʼ sanam koejoṅ do nonḍege mucạtʼ akana.