Sereńko 71 - সান্তালী বাইবেল

Mitʼṭen haṛam hoṛakʼ koejoṅ

¹ E Probhu Isor, iń do amregeń hirlạ akana, ar lajaore tishõ alom paṛao ocoyińạ.

² Am dom dhoromgete bańcaoińme, ar rukhiyạyińme; ińakʼ katha luturakʼme ar iń rukhiyạyińme.

³ Am do ińren aotan buru hoyokʼme one jao okte am ṭheniń sen daṛeakʼ. Am do ińren usul buru ar aotan gaṛ kanam, ar onatege iń rukhiyạyiń lạgitʼem hukum akada.

⁴ E ińren Isor, bedhoromkoakʼ ti khon, bạṛicʼ ar haḍrap hoṛkoakʼ ti khon bańcaoińme baṛe.

⁵ E Probhu Isor, ińakʼ as do amrege ar juạn okte khon amge ińren bhorsa do.

⁶ Janam khonge iń do amreń bhorsa akana; ińren eṅgạńakʼ kukhi khon amgem oḍok ạgukedińa. Amge ińren jao okteren sarhaoicʼ kanam.

⁷ Iń ńelte ḍher hoṛge cahapʼkateko koyokʼ kakʼa, menkhan am do ińren aotan gaṛ kanam.

⁸ Ińakʼ mocare amakʼ sarhao sereń do perecʼge tahena, ona do goṭa dinge amakʼ sarhaokʼ reakʼ kathae roṛeda.

⁹ Haṛam umerre alom giḍikạńa; ińakʼ daṛe do caba utạrentińạ, ar alom bạgi giḍikạńạ.

¹⁰ Ińren bạiri do iń upạrte kathako roṛeda; ar okoe iń gojeńko menetʼkan onko sanamko doko soṛojontro kana.

¹¹ Onko doko meneda, “Isor do uniye bạgi giḍi akadea; uni do laga sabepe, uni bańcaoe lạgitʼ do celege bạnukʼkoa.”

¹² E Isor, iń ṭhen khon sạṅgińre do alom tahena; E ińren Isor, iń goṛowạń lạgitʼ dela usạrate hijukʼme.

¹³ Iń upạrtenko do lajao arko maraokʼma; ar okoe muhinre paṛaoiń lạgitʼko kurumuṭukan onko do hirkhạ ar opomanteko danaṅ esedokʼ ma.

¹⁴ Menkhan iń do jaoge amreń bhorsakʼa, ar mitʼtalao geń sarhaomea.

¹⁵ Amakʼ dhorom kạmi ar amakʼ bańcaokʼ reakʼ katha do goṭa dinge ińakʼ mocare tahena, ente onako do baṅge lại cabakʼa.

¹⁶ E Probhu Isor, amakʼ dhorom reakʼ katha lại lạgitʼ amakʼ oṛakʼteń bolokʼa; ar amakʼ dhorom kạmi reakʼ kathageń roṛa.

¹⁷ E Isor, juạn okte khon amge sikhnạtem em akawạdińạ; ar teheń hõ amakʼ hahaṛa kạmi reakʼ kathań porcareda.

¹⁸ E Isor, teheń do haṛamkate upʼko pạnḍu caba akantińre hõ am do alom bạgi giḍiyińạ; tayom bõsrenko ṭhen amakʼ ektiạri reakʼ katha, ar darakan bõsko ṭhen amakʼ daṛe reakʼ katha baṛe lại sodor ocowạńme.

¹⁹ E Isor, amakʼ dhorom reakʼ kạmi do serma hạbicʼ seṭer akana; ar joto maraṅ kạmiko do amgem kạmi akada; E Isor, am samaṅre ar okoe menaea?

²⁰ Am do iń cetanre ạḍi kosṭo ar muhinem ạguakada, enhõ ińakʼ jiwi do arhõm jiwetʼ ruạṛtińạ; hasa latar khon rakapʼ ạguakatʼ leka am do arhõm rakapʼ ruạṛińa.

²¹ Iń doń meneda ińakʼ manotem ḍhertińa, jemon arhõ jiwi raṛecʼem emạń.

²² E ińren Isor, amakʼ pạtiạrtetʼ iạte iń do taranakʼ banam seletʼ iń sarhaomea; E Israelren sonoticʼ, iń do peṛesaṅ banamateń sarhao sereńama.

²³ Iń do tinre amiń sarhao sereńama unre ińakʼ moca do rạskạteye andoṛa; ińakʼ ontor do ame õṛhẽ sereńama, ente amge iń dom chaḍao akadińạ.

²⁴ Ińakʼ moca do siń sạṭupʼ amakʼ kạmi reakʼ kathageye lạiya, ente muhinre paṛao ocoyiń lạgitʼ okoeko kurumuṭukan tahẽkan onko do lajao arko bemanot ocoakana.