Sereńko 7 - সান্তালী বাইবেল

Hok bicạr ńam lạgitʼ koejoṅ

¹ E Probhu, ińren Isor, iń do amregeń hirlạ akana. Ar okoe ińko khudạu edeńkan onkoakʼ ti khon rukhiyạyińme, ar amge bańcaoińme.

² Ar baṅkhan onko do dhạcri kul leka jiwiko cirạitińạ; arko kaṭra kuṭrạ cabayińạ, ar iń bańcaoiń lạgitʼ do celege bako tahena.

³ E Probhu, ińren Isor, nonkanakʼ jãhãnakʼ iń kạmi akatʼ khan, ar bạṛicʼakʼ reakʼ jãhãn dag ińakʼ tire menakʼ khan,

⁴ ar ińren gateakʼ iń bạṛicʼ akatʼ khan, okoe do ạuṛiyakʼte ińren bạiriye hoylen iń do uni hõń bańcao akadea.

⁵ Enḍekhan bạiriko do ińko laga sabeńma; onko do otreko tawagińma arko lebetʼ gańjaoiń ma. Ar ińakʼ manot do dhuṛireko mesao giḍikakʼma. (Sela)

⁶ E Probhu Isor, edrete ma beretʼme, ińren bạirikoakʼ raṅgao upạrte ti tiạrtam. Iń lạgitʼ ebhenokʼme, ente amakʼ dhorom bicạr reakʼ katham lại jạhir akada.

⁷ Sanam jạtren hoṛ do am beṛhaeteko jarwakʼma; am do sermate ruạṛ senkate onko cetanre rajokʼme.

⁸ Probhu Isorge onko doe bicạrkoma. E Probhu Isor, ińakʼ dhorom kạmi ar sạriyakʼtetʼ lekage baṛe bicạrińme.

⁹ E dhoromren Isor, am do mon ar ontorem ḍunḍhạueda; amge bedhoromkoakʼ bạṛicʼakʼko cabaetakome menkhan amren dhoromko do teṅgo ṭarhao akae dohokom.

¹⁰ Isorge ińren ḍhal do; okoeyakʼ ontor khạṭige onkoge uni doe rukhiyạkoa.

¹¹ Isor do dhoromren bicạricʼ kanae, uni do bedhoromko jaogeye bicạrkoa.

¹² Bạṛicʼ hoṛko bako ạcur ruạṛlen khan uni do acʼakʼ tarwaṛeye lasertaea ar acʼakʼ akʼe gakʼ tearkakʼa.

¹³ Uni do acʼakʼ gogocʼ khanḍaye ṭhik dohoakada, ar acʼakʼ sarkoe seṅgel sar akawada.

¹⁴ Bedhoromicʼ do kukhire bạṛicʼakʼkoe dohoyeda, ar kukhire bạṛicʼakʼe dohoyte bedonreye paṛaokʼa ar eṛeyakʼkoe janam ocoya.

¹⁵ Uni do ghaḍlakʼ la kate ar ona khon hasa rakapʼkateye kholao akada ar acʼakʼ ghaḍlakʼre acʼgeye khańjokʼ akana.

¹⁶ Acʼakʼ bedhorom reakʼ bojha do acʼakʼ bohokʼrege ruạṛ hecʼaea; ar okoeye julumede ona do uniyakʼ bohokʼrege ńurokʼa.

¹⁷ Probhu Isor do dhorom reakʼe bicạra, onate iń do uniń sarhaoea; ar iń do maraṅ Probhu Isorakʼ iń õṛhẽ sereńa.