Sereńko 69 - সান্তালী বাইবেল

Goṛo ńam lạgitʼ rakʼ

¹ E Isor, bańcaoińme baṛe, iń do dakʼreń unumokʼ kana.

² Iń do khạndri gheorareń unumokʼ kana, onḍe do ińakʼ teṅgokʼ reakʼ ṭhạ̃ige bạnukʼa. Iń do khạndri dakʼreń paṛao akana; ar ḍubạ dakʼ do iń cetante ạtukʼ kana.

³ Hoho hohote iń doń laṅga cabayena, ar ińakʼ nạnḍri hõ rohoṛena; ińren Isor lạgitʼ koyokʼ horte ińakʼ mẽtʼ hõ dhund cabayentińạ.

⁴ Okoe khamakha iń cetanreko edrekʼkan Onkoakʼ lekha do ińakʼ bohokʼ upʼ khon hõ ḍhergea. Ar okoe iń nosṭoyińko menetʼkan onko do ạḍiko daṛegea; onko do eṛe iạte ińren bạiriko hoyakana. Ar bạń kombṛo akatʼre hõ em ruạṛ hoyokʼkan tińạ.

⁵ E Isor, am do ińakʼ lelhatetʼ reakʼ katham baḍaegea; ińakʼ dosko ińre oko do bạnukʼa.

⁶ E Probhu, sanam daṛeanicʼ Isor, okoe am koyokʼ horreko tahenkan onko do iń iạte lajao jemon aloko ńam. E Israelren Isor, okoe do am baḍaeme reakʼko ahkaokʼkan onko hõ iń iạte alo jemonko bemanot ocokʼma.

⁷ Iń do am lạgitʼge opomaniń sahao akada, ar bemanotte ińakʼ moca do danaṅ esetʼakana.

⁸ Ińren boehako ṭhen iń do bin opromicʼ iń hoyakana, ar eṅgat lacʼren boehako ṭhen do porjạt lekań hoyakana.

⁹ Amakʼ oṛakʼ lạgitʼ ińakʼ oka dulạṛ menakʼ, ona dulạṛge ińakʼ ontor doe jaljalao ocoyeda. Ar okoe amko bemanotetʼme onkoakʼ sanam opomange ińre paṛaokʼkana.

¹⁰ Ińakʼ rakʼjoṅ ar ińakʼ upạs reakʼ kosṭo do ińakʼ durnam lekage hoyakantińạ.

¹¹ Ar gõṛẽ kicricʼ iń horokʼetʼ tahẽkanre hoṛko do ińko landa dhutʼạńkan tahẽkana.

¹² Okoe nagraha reakʼ duạr ṭhenko duṛupʼkan onko talare ińakʼ kathako rakabokʼ kana; ar bul hoṛko hõ iń iạte sereńko joṛaoeda.

¹³ Menkhan E Probhu Isor, amakʼ daya tinre ńamokʼkan tahẽkana unrege iń do am ṭheniń koejoṅkan tahẽkana; E Isor, amakʼ asambheṛ dulạṛte amakʼ babańcao reakʼ pạtiạrtetʼ ńelte roṛ ruạṛạńme.

¹⁴ Gheora khon bańcaoińme, ar alom unum ocoyińạ; ińren bạirikoakʼ ti khon am do bańcaoiń me. Ar khạndri dakʼ khon bańcaoińme.

¹⁵ Ḍubạ dakʼ jemon iń cetante alo ạtukʼ; ar athantar dakʼ jemon bae unum daṛeạń; ar kuń hõ alo jemone sikupʼ esediń.

¹⁶ E Probhu Isor, amakʼ daya reakʼ asambheṛ dulạṛte roṛ ruạṛạńme baṛe; ar amakʼ asambheṛ dayate iń secʼ ạcurokʼme.

¹⁷ Amren golam secʼ khon amakʼ mẽtʼãhã do alom ạcurtama; iń do muskilreń paṛao akana, ńitge roṛ ruạṛạńme baṛe.

¹⁸ Am do iń ṭhen hecʼkate chaḍao ińme; ar chaḍaoińme, ente ińren do bạiri menakʼkoa.

¹⁹ Ar tinạkʼgan hirkhạ, lajao ar bemanotan hoṛiń hoyakan ona dom baḍaegea; ińren sanam bạiriko hõ am samaṅrege menakʼkoa.

²⁰ Hirkhạ iạte ińakʼ mon do rạputʼ akana onate iń doń kạhil akana. Ińakʼ dukte jemon eṭakʼkoko dukokʼ ar onage iń doń khojkan tahẽkana, menkhan ona do bạń ńamleda. Jiwi raṛecʼko emdaṛeạń hoṛiń khojletʼkoa, menkhan onkan okoe hõ bạń ńamletʼkoa.

²¹ Onko do ińakʼ jomakʼre bisko mesalada ar tetaṅedeń jokhecʼ do sirkạko emadińạ.

²² Onkoakʼ bhoj reakʼ rạskạ do pạsi hoyokʼtakoma, ar nirạite tahen do onkoakʼ jhạlige.

²³ Onkoakʼ mẽtʼ do kãṛãkʼtako ma jemon aloko ńeńel, ar onkoakʼ dea do jaejug kubjạ akan tahentako ma.

²⁴ Amakʼ raṅgao do onko cetanre upʼgotʼkakʼme; amakʼ jaljalaokʼkan raṅgao do onkoe sapʼpaṭetʼkoma.

²⁵ Onkoakʼ tahen jaega do ujạṛakʼge hoyokʼma; onkoakʼ tạmbure cele hõ aloko tahenma.

²⁶ Am okoeyem sạjại akade onko do unigeko santao akadea; ar okoeyem dal akatʼko onkoakʼ jaljalaoge onkoakʼ galmarao reakʼ bisoe do hoyokʼkana.

²⁷ Onko do bedhorom cetan bedhorom ocoakome; jemon amakʼ bańcao reakʼ bhag aloko ńam.

²⁸ Jiwetʼkoakʼ tạlika khon onkoakʼ ńutum do meṭaokʼtako ma, ar Isor botoraekoakʼ tạlikare onkoakʼ ńutum do alo tahen ma.

²⁹ Iń do duk ar hasoreń paṛao akana; E Isor, am do bańcaoińme baṛe ar onko khon pharakińme.

³⁰ Iń do sereńate Isoriń sarhaoea; ar gun manao joharate uniń sarhaoea.

³¹ Daṅgra ar dereń ar khurạ seletʼ damkom dãṛẽ khon Probhu Isorge bạ̃ṛtiń kusi ocoyea.

³² Ona ńelte mạ̃hir hoṛ doko kusikʼa; ar okoe do Isor baḍaeye reakʼpe ahkaokʼ kan, ape do jiwetʼ tahenpe.

³³ Probhu Isor do nacarkoakʼ kathae ańjoma; ar uniren hoṛko, okoe do bundi dosare menakʼko, onko do nicạṛ mẽtʼte bae ńelkoa.

³⁴ Serma ar ot do unikin sarhaoema; jalapuri ar onaren sanam jiwiyanko do uniko sarhaoema;

³⁵ Ente Isor do Sione bańcaoa ar Jihudạ reakʼ nagrahako do arhõe beretʼ ruạṛa; unre uniren hoṛko do onḍeko girobasokʼa ar ona reakʼ ạidạrikoko hoyokʼa.

³⁶ Ar uniren golamren bõsren hoṛko do ạidạri lekate onako ńama, ar okoe uniko dulạṛe onko do onḍeko tahena.