Sereńko 68 - সান্তালী বাইবেল

Jitạukʼ reakʼ sereń

¹ E Isor ma beretʼme, uniren bạiriko doko chirchạtur cabakʼma ar uni birudrenko do uni samaṅ khonko ńirjoṅma.

² Dhũạ leka onko do oṭaṅ idikom; ar seṅgel samaṅre cherokʼkan mom leka bedhoromko do Isor samaṅ khonko mohor meṭaokʼma.

³ Menkhan Isor botoraekanko doko kusikʼma ar Isor samaṅreko rạskạkʼma; onko do kusiteko hulạsokʼma.

⁴ Isor lạgitʼ sereńpe, ar uni õṛhẽ sereńaepe; hahaṅkar talate okoe do rãt gạḍire decʼkateye hijukʼkan uni lạgitʼ usul hor tearpe; uniyakʼ ńutum do Probhu Isor, uni samaṅre hulạsokʼpe.

⁵ Isor do acʼakʼ sonot ṭhạ̃ire ṭũạrkoren baba kanae ar rạnḍiko secʼrenge.

⁶ Apnarakʼ mente okoeyakʼ bạnukʼtae uni do acʼakʼ gharońjren hoṛe hoeocoyetʼkoa; ar bondiko chaḍaokate bhạlại secʼe idiyetʼkoa, menkhan uni tạkicʼ daram edekanko do khaṅgoṭ disomreko tahenkana.

⁷ E Isor, am do tinre hahaṅkar talate amren hoṛko laha lahatem calakʼkan tahẽkana, (Sela)

⁸ unre dhạrti do daldalao lena ar serma do dakʼe emlena. Noako do hoylena Isor samaṅre, Sinạiren uni Isor samaṅrege, Isor samaṅre, Israelkoren Isor samaṅre.

⁹ E Isor, am do asecʼ tasecʼ dakʼem jạṛikeda; ar khaṅgoṭokʼkan disạm dom daṛe ruạṛ ocokeda.

¹⁰ Ar amren hoṛko do onareko girobaslena; amakʼ bhage sanate, E Isor, am do onkoakʼ okulạnkom meṭaoleda.

¹¹ Probhu Isor do hoṛkoe hukumatʼkoa; ar bhage sombat lại jạhir maejiuko doko ḍhergea.

¹² Onko maejiu doko meneda, “Lạṛhại phạdkoren raj doko dạṛjoṅ kana, onko doko dạṛjoṅ kana, ar oṛakʼre menakʼko maejiuko do luṭakʼ jinisko hạṭińjoṅ kana.

¹³ Bhiḍi chaṛko talare tinre giticʼ akanpe tahena, unre ape do nonkan potamko lekape ńelokʼa one onkoakʼ phạ̃kṛạ̃kʼ do rupạte esetʼge ar il do sonate dalopʼ akan.

¹⁴ Sanam daṛean Isor do tinre disạm talare rajkoe chirchạtur ocoletʼkoa, unre Salmon burure do him ńurokʼkan tahẽkana.”

¹⁵ Bashan buru reakʼ sạr do ạḍi utạr jaega hạbicʼ menakʼa; ar ona reakʼ cuṛạko do ạḍi utạra.

¹⁶ E aema cuṛạ reakʼ buru, Isor oka burure acʼakʼ tahen reakʼ jaegae bachao akawan am do cedakʼ hiskạte ona secʼem beṅgetʼ akada? Probhu Isorakʼ jaejug reakʼ tahen ṭhạ̃i ma ona kange coṅ.

¹⁷ Isorakʼ rãt gạḍi do hajar hajar, lakh lakh; Probhu Isor do onako talare sonot ṭhạ̃ire menaea, cetʼleka uni do Sinại burureye tahẽkan.

¹⁸ Tinre am do sermatem rakapʼena unre lạṛhại kạidikom idiketʼkoa. Ar hoṛko talare, teṅgo daramko talare tahen jokhecʼ am ṭhen do ạḍi utạr dan hecʼlena, jemon am do, E Probhu Isor, onko talarem tahẽ daṛeakʼ.

¹⁹ Bhorangeae Probhu Isor do, uni do dinạm hilokʼge aboakʼ bojhae ladejoṅ kana; unige aboren babańcaoicʼ Isor do. (Sela)

²⁰ Aboren Isor doe nonkan Isor kana one okoe doe babańcaoicʼkan; Probhu Isor do gujukʼ khone rukhiyạ bona.

²¹ Isor do begor digdhạtege acʼren bạirikoakʼ bohokʼe gejertakoa; ar okoe kạireko jobe akae menakʼko onkoakʼ bohokʼ reakʼ khạpri hõ uni doe gejertakoa.

²² Probhu Isore menkeda, “Iń do Bashan disạm khon onkoń ạgukoa; jalapuri reakʼ khạndriyakʼko khoniń rakapʼ ruạṛkoa,

²³ jemon amakʼ jaṅga do amren bạirikoakʼ mãyãme lebḍae ar amren seta do ona jemonko caṭokʼ daṛeakʼ.”

²⁴ E Isor, hoṛko do amakʼ dãṛãnko ńel akada, ar sonot jaega secʼ ińren Isorakʼ senokʼko ńel akada, okoe doe ińren rajkan.

²⁵ Laha lahate sereńko, ar onko tayomre do bajna darkoge; ar jhurjhuri saḍeyetʼkan kuṛiko do onko tala talate.

²⁶ Apeakʼ joto jarwakʼre Isor sarhaoepe; ape okoe dope Israel bõsren hoṛkan, ape do Probhu Isor sarhaoepe.

²⁷ Jotoko khon huḍiń utạricʼ Benjạmin, hankoko calakʼkana uniren bõsko, one okoeyakʼ tire do rajakʼ sạjại menakʼ; hanko Jihudi mukhiyạko, okoe doko saṅgege; hanko Sebulonren mukhiyạko ar hankoko calakʼkan Naphtạliren mukhiyạko.

²⁸ Amren Isor ṭhen khon amakʼ daṛe do hecʼakana. E Isor, amakʼ daṛe udugme, lahate am do ale secʼ hoekate kạmim udukʼletʼa.

²⁹ Jerusalemre mitʼṭecʼ oṛakʼ menakʼa: onḍege raj do am ṭhen sandesko idiya.

³⁰ Onko ar onkoakʼ ạguakʼ rupạ reakʼ ṭakako baṛe lebetʼ gańjaome ar pạṭiol gaṛren bir janwar ar Misor do dhomkao emaeme; dhomkao kom bạchur ar phẽṭaṛko leka onko jạtrenkoge. Ar okoe jạtrenko do lạṛhạiko kusiyakʼkan Isor do onkoe chirchạtur cabakoa.

³¹ Misor khon rajren goḍet doko hijukʼa; ar Kusren hoṛko do hare phare Isor secʼ tiko tiạr takoa.

³² E dhạrtiren rajko, Isor sarhao sereńaepe, ar Probhuge sarhao sereńaepe. (Sela)

³³ Uni do sedaere rimil talate rãt gạḍiteye calakʼkan tahẽkana. Ańjompe, uni do murukteye meneda.

³⁴ Lại saḍepe, Isor doe daṛeangea; uniyakʼ ṭhonok do Israelko cetanre menakʼa ar serma hạbicʼ uniyakʼ daṛe do menakʼtaea.

³⁵ E Isor, amakʼ sonot ṭhạ̃ire amem hạjirlenre do botor hijukʼa. Israelren Isor do uniren hoṛkoakʼ daṛe ar ektiạriye emako kana. Isorakʼ sarhaoge baṛe hoyokʼtae ma.