Sereńko 66 - সান্তালী বাইবেল

Sarhao ar gun manao reakʼ sereń

¹ Dhạrtiren manwako, ape jotoge Isor sarhao sereńaepe.

² Uniyakʼ sarhao sereńpe; uni do lek leka sarhaoepe.

³ Isor metaepe, “Amakʼ kạmi ńelte monre botor ar bhokti do rakabokʼ kana. Amakʼ maraṅ daṛe samaṅre amren bạiriko do tumbutʼ hape reakʼko bhankakʼa.

⁴ Dhạrtiren sanam manwa do lek leka manotko emama; ar onko do am ńutumteko sarhao sereńa; onko do amko sarhaomea.” (Sela)

⁵ Ape do dela hijukʼte Isorakʼ kạmi ńel idipe; manwa lạgitʼ uni okaṭakʼe kạmi akatʼ ona do monre botore rakapʼ ocoyeda.

⁶ Uni do jalapuriye rohoṛ ocoleda; ar onko do taṛamte gaḍako paromlena. Dela bon, abo do disạmre uni iạte bon rạskạkʼma.

⁷ Uni do acʼakʼ daṛetege jaejug hạbicʼe rajokʼa; uniyakʼ mẽtʼ do sanam jạtrenko cetanre menakʼa. Isor upạrte okoeko teṅgonkan onko do apnarte maraṅ aloko hudisokʼma. (Sela)

⁸ Sanam jạtren hoṛko, aboren Isor sarhaoepe; uniyakʼ sarhao sereń jemon ańjom ńamokʼ.

⁹ Unige aboye bańcao doho akatʼbona ar aboakʼ jaṅga doe teṅgo ṭarhao ocoakada.

¹⁰ E Isor, am dom bachao akatʼlea; rupạ reakʼ mạilạ oḍok giḍikakʼ leka am do alem sapha akatʼlea.

¹¹ Amge ale do jhạlirem bolo ocoketʼlea ar aleakʼ deare bojham ghuguwatʼlea.

¹² Am do aleakʼ bohokʼ cetante sadomre decʼkate hoṛkom sen ocoakatʼkoa. Seṅgel ar dakʼ talate ale dole hecʼakana, menkhan am do ạsirbad hotetege.

¹³ Iń do jeredokʼ samaṅokʼakʼante amakʼ oṛakʼteń hijukʼa ar am ṭhen ińakʼ manotakʼkoń purạutińạ.

¹⁴ Onako manot reakʼ katha do mocateń roṛleda, ar muhin hilokʼ hõ onań roṛ akada.

¹⁵ Iń do am lạgitʼ lodgopʼ janwarkote jeredokʼakʼ iń samaṅ ama ar ona sãote jeredokʼ bhiḍi reakʼ mońj sogeń samaṅama; iń do ḍaṅgra ar meromgeń dãṛẽama. (Sela)

¹⁶ Okoe Isorpe bhoktiaekan ape do ańjompe; iń lạgitʼ uni okaṭakʼe kạmi akatʼ onań lạiyapea.

¹⁷ Iń do ińakʼ mocateń hohoade tahẽkana; ińakʼ mocare do uniyakʼ sarhao tahẽkana.

¹⁸ Ińakʼ ontorre bedhoromiń dohokakʼ khan Probhu do ińakʼ katha ohoe ańjomlea.

¹⁹ Menkhan Isore ańjomakatʼtiń onare jãhãn bhul do bạnukʼ anaṅ; uni do ińakʼ koejoṅe lutur akawada.

²⁰ Isorakʼ sarhao hoyokʼtae ma! Uni do ińakʼ koejoṅ bae dea giḍiakada se ińre uniyakʼ asambheṛ dulạṛ do baṅ bond akana.