Sereńko 65 - সান্তালী বাইবেল

Sarhao ar gunman johar

¹ E Isor, Sionre amakʼ sarhao do guṛumre hoyokʼkana; aleakʼ joto manotakʼ do am lạgitʼ purunokʼa.

² E koejoṅ ańjomicʼ, am ṭhenge sanam manwa doko hijukʼa.

³ Ińakʼ bedhoromakʼ kạmire iń doń tạpukʼ akana, Menkhan amge aleakʼ sanam kạikom ikạyetʼtalea.

⁴ Bhạgangeae uni hoṛ, one okoeyem bachao joṅ ar am ṭhenem ạguyede, jemon amakʼ racareye girobas daṛeakʼ. Amakʼ oṛakʼre, amakʼ sonot tahen ṭhạ̃i reakʼ bhorte ale dole tirpitokʼa.

⁵ E aleren babańcaoicʼ Isor, amakʼ dhorom reakʼ botoranakʼ kạmikote am do aleakʼ hohom luturakʼa. Dhạrtiren sanam manwa, ar sanam khon sạṅgińrenko ar jalapuri hanasaren hoṛko hõ amreko bhorsakʼa.

⁶ Amakʼ daṛetege sanam buru ar ḍuṅgriko do teṅgo akana; ar noate sodorokʼ kana am dom daṛeanicʼ kana mente.

⁷ Amge jalapuri reakʼ hud hudem thir ocoyeda, ar ḍheoko reakʼ hud hud ar jạtikoakʼ gulmalkom thir ocoyeda.

⁸ Sanam hoṛ, se, ḍher sạṅgińren hoṛko hõ amakʼ hahaṛa cinhạ reakʼ kạmi ńelteko botorokʼa; siń cando rakabokʼ khon hạsurokʼ hạbicʼ amge rạskạ sereńte sanam jaegakom perecʼ akada.

⁹ Amge dhạrti reakʼ otem hiriakada ar onare dakʼem jạṛiyakʼ kana; amge ona reakʼ sarsao ḍher ocoyme; am ṭhen khonge jạṛi dakʼ do pheḍ hijukʼkana; ar manwako phosolem emako kana. Ar nonkage am do hasam teareda.

¹⁰ Cas akatʼ nahel gaḍako am dom dakʼakʼ kana ar ona reakʼem somankakʼ kana; achaṛ dakʼkote onam lạbitʼeda ar nãwã omonokʼ carakom bhorakʼ kana.

¹¹ Bochor do ḍher okocʼ bhortem bhạlại akada; ar amakʼ dãṛãn reakʼ horre asambheṛ bhor do jhurokʼ kana.

¹² Ona do jhurokʼkana janwarkoakʼ ạtiń ṭạnḍikore; ar buru lodamre do rạskạ reakʼ sajge menakʼa.

¹³ Mitʼke mitʼ ṭạnḍi do bhiḍi palkote perecʼ akana, ar buru nala do anajkote dalopʼ akana; onako do hulạsteko hohoyeda arko sereńeda.