Sereńko 64 - সান্তালী বাইবেল

Rukhiyạ ńam lạgitʼ koejoṅ

¹ E Isor, ińakʼ ạrji ańjomtińme; ar bạirikoakʼ botor khon ińakʼ jiwi bańcaotińme.

² Bạṛicʼ soṛojontrokoakʼ ti khon bańcaoińme; okoe bạṛicʼ kạmiko kạmikan onko hoṛkoakʼ kạumạu khon bańcaoińme.

³ Onko do tarwaṛe leka akoakʼ alaṅko dhar akatʼtakoa, onkoakʼ haṛhatʼ katha do akʼ sarreko lagao dohoakada;

⁴ jemon danaṅ jaega khon dhorom hoṛko secʼ ona sarko aṛakʼ daṛeakʼ; ar onko do ackageko aṛaga ar bako botorokʼa.

⁵ Onkoakʼ bạṛicʼ goṭawakʼ doko diṛho ocoya, ar oko okote pạsi oḍao reakʼko solhaya; onko doko mena, “Okoe hõ onte do bako beṅgeda.”

⁶ Onko do bedhorom reakʼ motlob aṭaokateko mena, “Abo do sanam secʼ hudis cintạkate mitʼṭecʼ bon goṭayeda.” Sạrige manwa mon ar ontor reakʼ khạndritetʼ do ohoge jokha daṛelena.

⁷ Menkhan Isor do onko cetanre sare aṛaga; ar onko do ackage sar bitʼakoa arko bhindạṛokʼa.

⁸ Onko do akoakʼ alaṅtege muskilko ạgujoṅ kana; onko beṅgetʼakote sanamkoge bohokʼko rukuitakoa.

⁹ Unre sanamkoakʼ monre botor caṛhao akoa; ar Isor okaṭakʼe ceka akatʼ onko do onako lại sodora ar ona kathageko moneyakʼa.

¹⁰ Isor bhokti hoṛ do Probhu iạteko rạskạkʼa ar uniregeko hirlạkʼa; ontorre okoeko khạṭige onko do uniko sarhaoea.