Sereńko 63 - সান্তালী বাইবেল

Isor lạgitʼ ahkaokʼ

¹ E Isor, am do ińren Isorge. Iń do amiń ńam baṛayetʼmea; noa khaṅgoṭ ar dakʼ bạnukʼ disạmre, one uni do phosol hoeocoy reakʼ daṛege caba akantae, onḍe do am lạgitʼ ińakʼ jiwi tetaṅokʼ kantińạ, ar am lạgitʼ ińakʼ hoṛmo do ahkaokʼ kana.

² Nonkage ona sonot ṭhạ̃ire iń doń ńel akatʼmea, ar amakʼ daṛe ar ṭhonok hõń ńelakada.

³ Amakʼ asambheṛ dulạṛ ńam joṅ do bańcao tahen khon hõ bogegea; ińakʼ moca do ame sarhaomea.

⁴ Iń do jiwetʼ tahen bhor amiń sarhaomea; ar am ṭhen iń do ti tulkateń koejoṅa.

⁵ Jel ar itilanakʼte tirpitokʼ hoṛ leka ińakʼ jiwi do tirpitokʼ kana; ińakʼ moca do maraṅ rạskạte amakʼgeye õṛhẽ sereńa.

⁶ Aṭetʼre giticʼkate amakʼ katha reakʼ iń ganḍonokʼ kana, ar ńindạ do pohrek pohrekre am reakʼ iń dheneda;

⁷ ente am kangeam ińren gokʼṛoyicʼ; amakʼ phạ̃kṛạ̃kʼ reakʼ umulre iń doń sereńjoṅ kana.

⁸ Ińakʼ jiwi do ame sapʼ uricʼ akatʼmea; ar amakʼ jojom ti do ińe sapʼ doho akadińạ.

⁹ Okoe ińakʼ jiwi cabaetiń lạgitʼko sendrayediń kan onko do dhạrti reakʼ joto khon latar jaegateko pheḍokʼa.

¹⁰ Onko do tarwaṛe samaṅreko doho ocokʼa; ar toyokoren jomakʼko hoyokʼa.

¹¹ Raj do mekhan Isor iạtegeye rạskạkʼa; ar okoe Isorakʼ ńutumteko kiriạkʼkan onko do jotoge uni iạteko sarhaokʼa; menkhan phạsiạrakoakʼ moca do bond ocokʼtakoa.