Sereńko 61 - সান্তালী বাইবেল

Rukhiyạkʼ lạgitʼ koejoṅ

¹ E Isor, ińakʼ rakʼjoṅ ańjomtińme; ar ińakʼ koejoṅ luturakʼme.

² Ińakʼ mon loraolen tińre hõ ar dhạrti reakʼ mucạtʼ simạkoreń tahenre hõ iń do onḍe khon hõ amiń hohowama. Ar nonkan usul aotan burure ạyur rakabińme okaṭakʼ do iń khon ḍher pharakre menakʼ.

³ Am kangeam ińren hirlạ do; bạiriko upạrte amkangeam ińakʼ daṛeanakʼ aotan gaṛ.

⁴ Amakʼ tạmbure jemon jaejug hạbicʼ iń tahẽ daṛeakʼ; ar amakʼ phạ̃kṛạ̃kʼ latarre jemon hirlạń ńam. (Sela)

⁵ E Isor, ińakʼ monejoṅakʼko dom ańjomakatʼgea; am okoeko botoram kan ar onko lạgitʼ okaṭakʼ ạidạrim ṭarhao dohoakatʼ ona do amgem emakawạdińa.

⁶ Am do rajakʼ bahaokʼ dinem ḍher ocoyeda; uni do piṛhi cetan piṛhi jiwetʼe tahena.

⁷ Uni do jaejug hạbicʼ Isor samaṅreye tahen ma; uni rukhiyạye lạgitʼ amakʼ khạndri dulạṛ ar pạtiạr do amakʼ kạmire lagao ocoyme baṛe.

⁸ Iń do jaejug hạbicʼ iń sarhaomea, ar dinke din ińakʼ manotakʼ iń purạua ma.