Sereńko 60 - সান্তালী বাইবেল

Bańcaokʼ lạgitʼ koejoṅ

¹ E Isor, am do alem dea giḍiakatʼlea, ar alem chiń chạtur akatʼlea; am do ạḍitetʼ bam kusi akana, menkhan am do lahate lekam teṅgo arolea.

² Am do dhạrtim daldalao ocoyeda, arem paṛakʼ ocoyeda; am do ona paṛakʼko bondme, ente disạm do ḍikạ ḍakekʼ kana.

³ Amren hoṛko do akalem ńel ocoakatʼkoa; ar nonkan darkha nạ̃ṛĩ reakʼ rasam ńũ ocoakatʼlea onate ale do bul hoṛko lekale taṛameda.

⁴ Okoe amko botoram kan onko do mitʼṭecʼ jhanḍam em akawatʼkoa, jemon ona do sạriyakʼ secʼ tul rakabokʼtako. (Sela)

⁵ Amakʼ daṛeanakʼ ti tiyạrte ale baṛe bańcaolem; ińiń hohowamre ańjomtińme jemon am okoeyem dulạṛetʼko onko do bańcaoko ńam.

⁶ Isor do acʼakʼ sonot ńutumteye meneda, “Iń do rạskạ salakʼ Sikemiń hạṭińa, ar Sukot reakʼ tapol jaegań soṅa.

⁷ Gilead do ińakʼ kana, ar Manase hõ ińakʼge; Ar Ephrayim do ińakʼ bohokʼ aḍokʼakʼ kana, Jihudạ do ińakʼ rajosṭi reakʼ ṭheṅga kana.

⁸ Moab do ińakʼ jaṅga ạbukokʼ bhajan kana; iń do Edomre ińakʼ panahiń capatʼ giḍiytińạ; ar Philisṭi, am do iń lạgitʼ em kikiạukʼa.”

⁹ Ona gaṛ nagrahate do okoeye ạyur idińạ? Ar okoe Edom reakʼ hor doe udukʼạńạ?

¹⁰ E Isor, am do cetʼ alem bạtil akatʼlea? Aleren phạdko tulucʼ do ar bacom calakʼkan.

¹¹ E Isor, bạiriko upạrte am do goṛowaleme, ente manwakoakʼ goṛo lạgitʼ ona do jãhãn damge bạnukʼa.

¹² Isorakʼ goṛote ale dole jitạukʼa; ar aleren bạiriko uni doe lebetʼ gańjaokotalea.