Sereńko 6 - সান্তালী বাইবেল

Gạr jokhecʼ goṛo ńam lạgitʼ koejoṅ

¹ E Probhu Isor, edrete alom egerińạ; ar bekusi iạte hõ alom ḍanṭaoińạ.

² E Probhu Isor, dayawạńme, enteń nijorgea. E Probhu Isor, bogeyińme, ente ińakʼ jaṅko do botorte thar tharaokʼ kantińạ,

³ ar jiwire hõ botor caṛhao akawạdińa. E Probhu Isor, ar tinạkʼ din ona do calao idikʼa?

⁴ E Probhu Isor, iń secʼ ạcurokʼme, ar rukhiyạyińme; amakʼ khạndri dulạṛ iạte, bańcaoińme.

⁵ Gocʼlenre do ohoń disạ daṛelema; ar patal purire do okoeye gun manao joharama?

⁶ Iń do kuhrạu kuhrạuteń laṅga caba akana; goṭa ńindạ rakʼ rakʼte aṭetʼiń lohotʼetʼtińạ, ar mẽtʼ dakʼte ińakʼ parkomiń ḍiń ḍạbureda.

⁷ Duk iạte ńeńel reakʼ daṛe hõ komao akantińạ; ar bạiriko iạte ińakʼ mẽtʼ do nijor caba akantińạ.

⁸ E bạṛicʼ kạmiyetʼkan hoṛko, ape sanamkoge iń ṭhen khon men ńirjoṅpe, ente Probhu Isor do ińakʼ rakʼe ańjom akatʼtińạ.

⁹ Ińakʼ nehõr do Probhu Isore lutur akawada, ar ińakʼ koejoṅe ataṅ akatʼtińạ.

¹⁰ Ińren bạiriko do sanamkogeko lajao ocokʼa arko botorokʼa; onko doko ruạṛokʼa, ar ackage lajaoreko paṛaokʼa.