Sereńko 59 - সান্তালী বাইবেল

Nirạite tahen lạgitʼ koejoṅ

¹ E Isor, ińren bạirikoakʼ ti khon bańcaoińme; iń upạrtenko khon am do usulakʼre dohokạńme.

² Okoe bạṛicʼakʼko kạmiyetʼ kan onkoakʼ ti khon bańcaoińme; ar khuniạhikoakʼ ti khon rukhiyạyińme.

³ Onko do iń lạgitʼko tãṛãkʼ akana, ar daṛean hoṛko do iń hạneń lạgitʼko jarwa akana; E Probhu Isor, ona do ińakʼ jãhãn bedhorom se kại lạgitʼ do baṅ hoyakana.

⁴ Iń do jãhãnakʼ bạń dos akatʼa, enhõ onko do ńir hecʼkate iń upạrteko teṅgo akana. Iń goṛowạń lạgitʼ beredokʼme, ar ińakʼ muhin ńelme.

⁵ E sanam daṛeanicʼ Probhu, Israelkoren Isor, am do sanam jạtrenko sạjại emako lạgitʼ ma beretʼme; ar phạsiạrako do alom daya akoa. (Sela)

⁶ Onko do ạyupʼ secʼko ruạṛ hijukʼa, ar seta lekako gondraokʼa, onko do nagraha reakʼ sanam jaegareko dãṛã baṛaea.

⁷ Ńelme, onko do moca khon cokakʼ baklakʼko oḍokeda, onkoakʼ luṭi khon do tarwaṛe oḍokokʼ kana onko doko meneda, “Aboakʼ katha do okoe hõ bako ańjom ńama.”

⁸ Menkhan E Probhu Isor, am do onko ńeltem landajoṅ kana ar onko jạtrenkom landa dhutʼ akokana.

⁹ Onko doko daṛeangete iń do am koyokʼ horreń tahen kana, ente E Isor, am kangeam ińren aotan gaṛ do.

¹⁰ Isor do acʼakʼ asambheṛ daya iạte iń ṭhene hijukʼa, ar ińren bạirikoakʼ bhagaoe ńel ocoyińạ.

¹¹ E Probhu Isor, aleren ḍhal, ińren bạiriko alom gocʼ giḍikoa, ar baṅkhan ińren hoṛ do noako bako disạ dohoya. Am do bickom amakʼ daṛetem nonkakoa jemon hanḍe nanḍeko ạcur baṛae; ar amge baṛe onko do bhagaokom.

¹² Onkoakʼ moca reakʼ kại ar luṭi reakʼ kathare okaṭakʼ ạsis ar eṛeteakʼ menakʼ, onate onkoakʼ bạḍại iạteko sabokʼma.

¹³ Am do edrete onko marao giḍikakome, jemon onko do ar bako tahen; ar nonkate dhạrtiren sanamkoko baḍaea, Isorge Jakob bõsrenko cetanreye rajokʼa mente. (Sela)

¹⁴ Onko do ạyupʼ jokhecʼko ruạṛ hijukʼa, ar seta lekako gundrạukʼa, ar nagraha reakʼ sanam jaegareko dãṛã baṛaea.

¹⁵ Onko do jomakʼ lạgitʼ hante nateko ạcur baṛaea; ar lacʼ baṅ bi lentako khan goṭa ńindạko beṅgetʼ aṅgaya.

¹⁶ Menkhan iń do amakʼ daṛe reakʼ iń sereńa, ar setakʼre rạskạte amakʼ asambheṛ dulạṛ iạteń sereńa; ente am kangeam ińren aotan gaṛ, ar muhinren hirlạ.

¹⁷ E Isor, ińakʼ daṛete, iń do amiń õṛhẽ sereńama. Amge ińren aotan gaṛ do; ar amge uni Isor do, okoe do iń lạgitʼ asambheṛ dulạṛ menakʼtae.