Sereńko 58 - সান্তালী বাইবেল

Bạṛicʼ hoṛ sạjạiko lạgitʼ koejoṅ

¹ E bicạretʼkanko, ape dope thir hape akana noa do cetʼ hok reakʼ bicạr hoyokʼ kana? Ape do cetʼ hoṛkoakʼ hok reakʼpe bicạrkatako kana?

² Se, apeakʼ monre behok reakʼ monsubạ menakʼtapea; bicạr reakʼ tulạte dhạrtire ape do santaogepe soṅeda.

³ Janam khonge phạsiạrako do bạṛicʼ horteko calakʼkana; ar eṛe katha roroṛko hõ janam khonge bạṛicʼ horteko sen adokʼkana.

⁴ Biń bis lekage onkoakʼ bis do; onko do kala ayaṅ biń leka akote akoakʼ luturko bond esetʼ akatʼtakoa.

⁵ Uni biń do sapoṛiạkoakʼ aṛaṅ bae ańjoma, gạkhuṛ sapoṛiạwakʼ hõ baṅa.

⁶ E Isor, phạsiạrakoakʼ ḍaṭa do onkoakʼ mocarege coagtakome; E Probhu Isor, onko dhạcri kulkoakʼ laser ḍaṭa do amge rạputʼ giḍikatakom.

⁷ Onko do ạtukʼkan dakʼ lekako chanokʼma; ar akʼre lagao akatʼ sarko hõ rạpudokʼ takoma.

⁸ Cetʼleka goṅgha do calakʼ calakʼtegeye chanokʼkan onkage onko hõko chanokʼma; onko do eṅgatakʼ kukhire gocʼ akan gidrạ lekanako one okoe do marsal bako ńelńam.

⁹ Apeakʼ ṭukucʼre seṅgel reakʼ ãc ạuri paṛaokʼrege uni do rohoṛ ar jạnum sahanko birbão hoeteye oṭaṅ idiya.

¹⁰ Onko cetanre hala hạli hoylen khan Isor botoraeko doko kusikʼa; onko do phạsiạrakoakʼ mãyãmre jaṅgako ạbukokʼa.

¹¹ Ona ńelte hoṛkoko mena, “Isor botoraekan hoṛkoakʼ jionre sạri kuṛại do menakʼgea; sạrige eken mitʼ goṭen Isorge menaea one uni dhạrtirege bạṛicʼkoe bicạrko.”