Sereńko 57 - সান্তালী বাইবেল

Goṛo ńam lạgitʼ koejoṅ

¹ Ińre mãyãkʼme baṛe, E Isor, ińre dayakʼme, ente amrege iń doń hirlạ akana. Ar amakʼ phạ̃kṛạ̃kʼ umul reakʼ hirlạrege iń doń tahena tinạkʼ din iń cetan khon noa muhin reakʼ birbão baṅ ocogokʼ.

² Iń do maraṅ Isoriń hohowaea; okoe do acʼakʼ sanam kathae rukhiyạ akatʼtae iń do unigeń hohowaea.

³ Serma khon uniyakʼ goṛo do pheḍ hijukʼkana; okoe ińko laga baṛayediń kan onkoakʼ dos reakʼ katha roroṛ do bae thirokʼa. (Sela) Isor ṭhen khon unire asambheṛ dulạṛ ar pạtiạrtetʼ do pheḍ hijukʼa.

⁴ Reṅgecʼ edekan dhạcri kul leka hoṛko talare iń doń giticʼ akana; onkoakʼ ḍaṭa do borlom ar sar leka, ar alaṅ do laser tarwaṛe lekage.

⁵ E Isor, amakʼ man do serma hạbicʼ rakabokʼma; amakʼ ṭhonok do goṭa dhạrtire ńelokʼma.

⁶ Onko do ińakʼ dãṛãn horre jhạliko oḍao akada; santao iạte iń doń dormojlen tahẽkana; onko do ińakʼ horre ghaḍlakʼko layeda, menkhan onko do apnarge onareko khańjokʼkana. (Sela)

⁷ E Isor, ińakʼ mon do ṭarhaoge menakʼa, bạń ḍikạḍake akana; iń doń sereńa, ariń õṛhẽmea.

⁸ E ińakʼ ontor, ma ebhenokʼ me; binạ banam ar peṛesaṅ, ebhenokʼben; iń do aṅga marsaliń ebhen ocoyea.

⁹ E Probhu Isor, eṭakʼ eṭakʼ jạtrenko talare amiń sarhaomea, ar onko talare amiń õṛhẽ sereńama;

¹⁰ ente amakʼ asambheṛ dulạṛ do serma hạbicʼ menakʼa, amakʼ pạtiạrtetʼ do rimil cetante hõ calakʼ kana.

¹¹ E Isor, amakʼ mạhima do serma cetan hạbicʼ rakapʼma; ar amakʼ ṭhonok do goṭa pirthimire ńelokʼma.