Sereńko 56 - সান্তালী বাইবেল

Isorre bhorsakʼ reakʼ koejoṅ

¹ E Isor, dayawạńme baṛe, ente hoṛko do ińko laga baṛayediń kana. Ar jao ghuṛi lạṛhại iạteko kosṭoyediń kana.

² Ińren bạiriko do jaogeko laga baṛayediń kana; ar ḍherkoge bạḍại iạte iń tulucʼko lạṛhại kana.

³ Botor rakapʼạńre iń do am cetanreń bhorsakʼ kana.

⁴ Okoeyakʼ katha reakʼ iń sarhaoetʼkan, uni Isor cetanre, hẽ, uni Isor cetanrege iń doń bhorsa akana; Iń do bạń botorokʼa manwa do cetʼko cekayiń baṅ?

⁵ Onko do siń sạṭupʼ ińakʼ katha reakʼ bạṛicʼakʼ bhedko lại baṛaea ar iń hạneń reakʼ phundiko aṭaoa.

⁶ Onko do mitʼ ṭhenko jarwakʼa, ar iń lạgitʼko tãṛãgokʼa; ar gojeń reakʼ ạt ńam lạgitʼ onko do ińakʼ daṛanko tạnkhiyetʼa.

⁷ Onko do cetʼ behok akatʼ reakʼ sạjại bako ńama? E Isor, am do edrete jạtrenko marao giḍikakome.

⁸ Tinạkʼ dhaoiń ńir baṛa akatʼ ona mam baḍaege; ińakʼ mẽtʼ reakʼ mẽtʼ dakʼte amakʼ kupi perejtam. Noako do cetʼ amakʼ puthire ol bạnukʼa.

⁹ Tinre amiń hohowama, unre ińren bạiri doko dạṛ pạnḍuja; ińiń baḍaea Isor do iń secʼge menaea.

¹⁰ Isor, okoeyakʼ katha reakʼ iń sarhao sereńetʼkan, Probhu Isor, okoeyakʼ katha reakʼ iń gun manao joharetʼkan,

¹¹ iń do uni cetanregeń bhorsakʼ kana; ar bạń botorokʼa, manwa do cetʼe cekayiń baṅ?

¹² E Isor, am ṭhen okaṭakʼ manotakʼ iń dohoakatʼ ona doń purạuama; ariń gun manao joharama;

¹³ ente gujukʼ reakʼ ti khon am do ińakʼ jiwim rukhiyạ akatʼtińạ ar ńurokʼ khonem bańcao akadińạ, jemon jion reakʼ marsalre Isor samaṅreń dãṛãbaṛa daṛeakʼ.