Sereńko 55 - সান্তালী বাইবেল

Gateye bepạtiạrentae hoṛakʼ koejoṅ

¹ E Isor, ińakʼ koejoṅ luturakʼtińme; ińakʼ nehõrokʼre oko alom tahena.

^2-3 Iń secʼ beṅgedme, ar roṛ ruạṛạńme; ińren bạirikoakʼ katha reakʼ biste ar bạṛicʼkoakʼ santao khạtirte laṅgateń chaṭ paṭaokʼ kana ariń kuhrạueda. Onkoakʼ bạṛicʼ kạmi hotete onko do iń cetanre muhinko ạguiyeda, ar edrete ińko santaoedińa.

⁴ Noate ińakʼ ontor do dhak dhakaokʼ kantińạ; gujukʼ botorgeye sapʼ akadińạ.

⁵ Iń do botor caṛhao akadińạ ar botorteń thar tharaokʼ kana; ar botorteń ḍabao caba akana.

⁶ Ińiń meneda, “Hae, cẽṛẽ leka phạ̃kṛạ̃kʼ tahẽlen tiń khan! Enḍekhan uḍạu senkateń jirạukokʼa.

⁷ Hẽ, iń do ạḍi sạṅgińiń calaokokʼa, ar mitʼṭecʼ nisun jaegare senkateń tahẽkokʼa. (Sela)

⁸ Ińakʼ asray gaṛregeń ńir calaokokʼa, ar hoe bharḍo khon sạṅgińteń senkokʼa.”

⁹ E Probhu Isor, onko do marao cabakom, onkoakʼ roṛ do gaḍbaḍao ocoytakome; ente nagrahare iń do jor julum ar lạṛhạiyiń ńel akada.

¹⁰ Onko do cetʼ reakʼ coṅ sendrae lạgitʼ siń ńindạ nagraha reakʼ pạcrikoreko ạcur baṛaekana. Ar nagrahare do dusṭạmi ar bedhorom kạmiko calakʼ kana.

¹¹ Onare marao utạrakʼ kạmi hõ calakʼkana; santao ar phạsiạra kạmiko hõ nagraha reakʼ kulhi khon baṅ sạṅgiń akana.

¹² Okoe ińe bemanot akadiń uni do ińren bạiri kanae ona do baṅa, enḍekhan iń do onań sahao daṛekea; ar okoe iń khon apnartetʼe maraṅokʼkan uni hõ iń upạrten kanae ona do baṅa, enḍekhan iń do uni khon danaṅ akaniń tahẽkokʼa.

¹³ Menkhan ona dom onka akada, iń tur hoṛge, ińakʼ ontorren gate, ińren bhage gatege.

¹⁴ Alaṅ talare khạndri helmel tahẽkana; Isorakʼ oṛakʼre sewako soṅgekate alaṅ do mitʼ sãote laṅ calakʼkan tahẽkana.

¹⁵ Ińren bạiriko cetanre ackage moron baṛe hijukʼma; onko do jiwetʼtege patal puriteko calakʼma, ente oṛakʼ duạrre hõ onkoakʼ do bạṛicʼakʼ menakʼa.

¹⁶ Menkhan iń do Isorriń hohoaea, ar Probhu do ińe bańcaoińa.

¹⁷ Setakʼ, tikin ar ạyupʼ iń do botor salakʼiń ạjijaea, ar uni do ińakʼ aṛaṅe ańjomtińạ.

¹⁸ Okaṭakʼ lạṛhại iń upạrte calakʼkan tahẽkan onare iń upạrtenkoakʼ do maraṅ dol tahẽkana, onate uni doe chaḍao ạgukedińa ar nirạiteye dohoakadińạ.

¹⁹ Isor, okoe do etohopʼ khonge siṅghạsonre menae uni doe ańjoma ar onkoe sạjạikoa. (Sela) Onkoakʼ monre do jãhãn bodolge bạnukʼa, ar Isor hõ bako botoraekana.

²⁰ Ińren uni gate sãote okoe do sulukteko tahẽkan onko cetanrehõ uni gate do tiye rakapʼeda ar acʼakʼ bondobos doe rạputʼkeda.

²¹ Uniyakʼ moca reakʼ katha do makhon khon hõ cĩkạṛgea, menkhan uniyakʼ ontorre do lạṛhại menakʼa; uniyakʼ kathako do hoṛmore ojokʼ akatʼ sunum khon hõ noromgea, menkhan onako do khap khon or bocʼ akatʼ tarwaṛe lekage.

²² Amakʼ sanam bojha do Probhu Isorge ladeaeme, unige am doe bondobosama; ar acʼ botoraeko do tis hõ bae ṭasak ocokoa.

²³ Menkhan E Isor, khuniạhi ar phạsiarako do patal purirem khadlekoa, onkoakʼ bahaokʼ dinko adha ạuri hoyokʼrege; iń do am cetanreń bhorsakʼa.