Sereńko 53 - সান্তালী বাইবেল

Manwakoakʼ bạṛicʼtetʼ

¹ Bebuj hoṛ doko mena Isor do bạnuiya. onkoakʼ sobhab do bạṛicʼgetakoa, ar kạmiko hõ hirkhạgetakoa; bhage kạmikan hoṛ do okoe hõ bạnukʼkoa.

² Isor do serma khon latarte manwa secʼe beṅgetʼkeda; ar ńeljoṅe menana sạriyakʼ reakʼ ạkilte jãhãeko taṛameda se baṅa, menkhan okoe hõ Isorakʼ sana leka do bako calakʼ kana.

³ Uni doe ńelkeda sanamkoge sạri hor khonko ocokʼ akana, ar jotoge mitʼ domteko bạṛicʼ akana; bhageakʼ kạmi lạgitʼ do okoe hõ bạnukʼkoa.

⁴ Bạṛicʼakʼ kạmikanko do cetʼ nunạkʼgeko bebujgea? Hoṛko cetʼleka jomakʼko jometʼkan onkage onko do ińren hoṛko jometʼkoa; onko do Isor hõ bako hohoaea.

⁵ Amre jhãp emokʼkankoakʼ jaṅ do uniye gejertakoa; onko do lahate botor baṅ tahẽkantakore hõ, enhõ ńitokʼ do ạḍi bạṛicʼko botorena; Isor do onkoe bad giḍikatʼkoa, onate onko do lajaorem paṛao ocoakatʼkoa.

⁶ Israelkoakʼ babańcao do Sion khonge hijukʼa. Isor do tinre acʼren hoṛkoakʼ dosae ruạṛkatakoa unre Jakob bõskoren doko rạskạkʼa ar Israelko doko kusikʼa.