Sereńko 52 - সান্তালী বাইবেল

Isorakʼ bicạr ar daya

¹ E daṛeanicʼ bir banṭa, cedakʼ am do bạṛicʼakʼko iạtem gorbokʼkana? Isorakʼ dulạṛ reakʼ mucạtʼtetʼge bạnukʼanaṅ.

² Amakʼ alaṅ do nonosṭowakʼ lạgitʼgeye goṭayeda; E phạsiạricʼ, amakʼ alaṅ do laser holatʼ lekana.

³ Am do bhageakʼ khon bạṛicʼakʼkogem dulạṛeda, ar sạriyakʼ khon eṛeyakʼ roṛgem kusiyakʼ kana. (Sela)

⁴ E phạsiạricʼ alaṅ, am do okaṭakʼ nonosṭowakʼkan onagem kusiyakʼ kana.

⁵ Menkhan Isor do jaejug lạgitʼe marao giḍikama; uni do ame or ạgumea, amakʼ tạmbu khone chingạu ạgumea, ar jiwetʼkoakʼ disạm khone or totʼ giḍikama. (Sela)

⁶ Noa ńelte Isor botoraekanko do botor caṛhaoakoa; onko do amko landa dhutʼama arko mena,

⁷ “Hạni ńelepe, uni hoṛ Isor do acʼakʼ gaṛ bae hoyocoadea; uni do dhon sompotti cetanreye bhorsa akana, ar acʼakʼ bạṛicʼ sana reakʼ daṛete daṛeanicʼe hoyakana.”

⁸ Menkhan iń do Isorakʼ oṛakʼre hara idikʼkan Jạitun dare leka; iń do jaoge Isorakʼ asambheṛ daṛeregeń bhorsa akana.

⁹ Okaṭakʼem kạmikan onate iń do jaejug hạbicʼ iń sarhaomea; arem bhagete am botoramko samaṅre iń do am ńel horreń tahena.