Sereńko 50 - সান্তালী বাইবেল

Sạriyakʼ reakʼ dewa sewa

¹ Maraṅ daṛean Probhu Isor do, kathae roṛeda; purub khon pạchim hạbicʼ dhạrtiren sanamko uni doe hohoakatʼkoa.

² Sion khon, mońj utạrakʼ ṭhạ̃i khon, Isorakʼ marsal do pasnao akana.

³ Aboren Isor doe daraekana, uni do mocae jhijtaea; ar seṅgel do uni laha lahate sanamakʼe atar giḍiya; ar uni beṛhaete ạḍi botorgeye hoe bharḍoea.

⁴ Acʼren hoṛkoakʼ bicạr reakʼ hĩs hatao lạgitʼ uni do coṭ reakʼ rimile hohowae kana, ar dhạrti hõe hohoae kana;

⁵ Uni doe meneda, “Iń botorạń kanko do iń ṭhen jarwakom, one okoe do janwar dãṛẽko hotete ińakʼ bondobosko ataṅ akatʼ.”

⁶ Rimil do acʼakʼ dhorom bicạr reakʼ kathakoe lại saḍeakada, ente Isor doe bikʼcạricʼ kana.

⁷ “E ińren hoṛko, ańjompe, iń do kathań roṛeda; E Israel, iń do am upạrte gohań emeda; iń doń Isor kana, amren Isorge.

⁸ Janwar dãṛẽ iạte do bạń dusiyetʼmea; amakʼ jeredokʼ samaṅokʼakʼ ma coṅ jaoge iń samaṅre menakʼtam.

⁹ Amakʼ goṛaren ḍaṅgrako reakʼ hõ jạruṛ bạnukʼtińạ, ar amakʼ khạṛren meromko hõ baṅa;

¹⁰ ente birren sanam janwar do ińren kanako, ar buru coṭre ạcur baṛaekan janwarko hõ ińrenge.

¹¹ Bururen sanam cẽṛẽko hõń baḍae akatʼkoa, ar ṭạnḍiren sanam janwarko hõ ińren kangeako.

¹² Reṅgecʼlińre hõ iń do bạń metama, ente dhạrti do ińakʼ kana ar onare menakʼ sanamakʼ hõ ińakʼ kangea.

¹³ Cetʼem hudiseda ḍaṅgrawakʼ jel do ińakʼ jomakʼ kana? Ar meromakʼ mãyãm do ińakʼ ńũńuakʼ kana?

¹⁴ Isor ṭhen amakʼ gun manao joharge amakʼ dãṛẽ do hoyokʼtam ma; ar uni maraṅ utạricʼ ṭhenge amakʼ moneyakʼko hõ purạume.

¹⁵ Amakʼ muhinre hohowạńme; iń do amiń bańcaomea ar am do ińem manotińạ.”

¹⁶ Menkhan Isor do bạṛicʼ hoṛkoakʼ noa kathae meneda, “Ińakʼ ạn reakʼ katha se ińakʼ bondobos reakʼ katha roṛ reakʼ amakʼ do cetʼ jãhãnakʼ ektiạri menakʼtama?

¹⁷ Am ma ińakʼ ḍanṭaoem hirkhạwakʼ kan ar ińakʼ katha ma bam moneyakʼkan.

¹⁸ Kombṛom ńellere uni dom sãhãkʼae kana, ar loṭghuṭiko tulucʼ dom gatekʼkana.

¹⁹ Bạṛicʼ katha lạgitʼ amakʼ moca do jhicʼgetama, ar amakʼ alaṅ do phạsiạrateakʼ kathae roṛa.

²⁰ Am do amren boeha upạrte katham roṛa ar uniyakʼem oktawa.

²¹ Noako joto do amem onka akada, menkhan iń do moca bạń jhicʼ akatʼtińa; amem hudiseda am lekan mitʼ hoṛ kạnạń, menkhan iń do amakʼ doskoń udukʼama ar amakʼ sanamakʼ do am mẽtʼãhã samaṅreń uduga.

²² “Okoe Isorpe hiṛiń akade ape do hudisokʼpe; ar baṅkhan iń doń or cirạpea, ar ape bańcaope lạgitʼ do cele hõ bako tahena.

²³ Okoeyakʼ jionre gun manao joharge uniyakʼ dãṛẽkan unige iń doe manot edeńkana; ar okoe ińakʼ horteye calakʼkan uni doń bańcaoea”