Sereńko 5 - সান্তালী বাইবেল

Rukhiyạ ńam lạgitʼ koejoṅ

¹ E Probhu Isor, ińakʼ katha luturakʼme, ar ińakʼ ontor reakʼ khondrondjoṅ moneyakʼme.

² E ińren raj, E ińren Isor, amakʼ goṛo lạgitʼ ińakʼ rakʼjoṅ ańjomtińme, ente am ṭhengeń koejoṅ kana.

³ E Probhu Isor, din hilokʼ setakʼre ińakʼ katham ańjometʼ kana setakʼre iń do am samaṅre ińakʼ koejoṅiń samaṅetʼ kana ar askateń ńel hohorkana.

⁴ E Isor, am do bedhoromakʼre rạskạkʼ icʼ dom baṅkana; ente bạṛicʼ hoṛ do am samaṅre bako tahẽ daṛeakʼa.

⁵ Bạḍạiko do am samaṅre bako teṅgo ṭarhao daṛeakʼa; ar bạṛicʼakʼko kạmikan hoṛ dom kurudako kana.

⁶ Ar okoe eṛeakʼ kathako roṛ onko dom marao giḍikoa. Okoere khũn ar eṛe reakʼ monsubạ menakʼ Probhu Isor do onkoe hirkhạwako kana.

⁷ Menkhan iń do amakʼ asambheṛ dayateń bolokʼa, ar amakʼ sonot oṛakʼ secʼ samaṅkate botoram tulucʼ iń ombagokʼa.

⁸ E Probhu Isor, aema bạiri menakʼkotińte amakʼ dhorom horte ạyurińme; ar amakʼ hor sojhe kạtińme.

⁹ Ińren bạirikoakʼ oka katha hõ pạtiạuanakʼ do baṅkana, onkoakʼ ontorre do eken nosṭo reakʼ monejoṅakʼge menakʼa, onkoakʼ moca do oṭakʼ akatʼ topa lekana, onko do alaṅte cĩkạ̃ṛ cĩkạ̃ṛ kathako roṛa.

¹⁰ E Isor, onko baṛe bicạr dusikom; onko do akoakʼ bạṛicʼakʼ iạteko gurokʼma. Onkoakʼ ạḍi utạr ghạṭko iạte laga giḍikom, ente onko do am upạrteko teṅgo akana.

¹¹ Menkhan okoe amreko hirlạjoṅkan onko doko rạskạkʼma, onko do rạskạte jaejugko sereń joṅma; am do onkoge baṛe rukhiyạkom, jemon okoe amko dulạṛetʼme onko do am iạteko hulạs daṛeakʼ.

¹² E Probhu Isor, okoe amko botoram, onko cetanre sạrige amakʼ bhor do menakʼgea; ar amakʼ dayate onko do ḍhal lekam danaṅ esetʼ akatʼkoa.