Sereńko 49 - সান্তালী বাইবেল

Dhonre bhorsakʼ do ạuṛiyakʼtetʼ

¹ E sanam jạtrenko, ape do noa katha ańjompe; okoe do noa dhạrtirepe girobasokʼ kan ape sanamkoge ańjompe;

² Napṛakʼko huḍińko, kisạ̃ṛko, reṅgecʼko, ape sanamkoge ańjompe.

³ Ińakʼ moca khon do ạkil reakʼ kathako oḍok hijukʼa; ar ińakʼ ontor reakʼ khạndri hudisko bujhạu lạgitʼ daṛeye emokʼa.

⁴ Iń do cecetʼakʼte perecʼ phen kathakore moniń bạisạutińạ; ar peṛesaṅ sãote sereńate uniyakʼ khạndri hudis reakʼ iń galmaraoa.

^5-6 Okoe do dhon durib cetanreko bhorsa akan ar ḍher dhon iạteko bạḍạiyokʼkan, akalre uni bạiriyakʼ behokakʼ tinreye esetʼ ạcurińạ, unre do cedakʼ iń botorokʼa?

^7-9 Gujukʼ khon do okoe hõ bako bańcao daṛeakoa se chaḍao reakʼ dam Isor hõ bako em daṛeaea, jemon jaejug hạbicʼ jiwetʼe tahente uni do patal purite calakʼ baṅ hoyokʼtae; ente jiwi reakʼ dam do ḍhergetaea, ona dam reakʼ soman do cetʼge bạnukʼa.

¹⁰ Ạkilan hoṛ hõko gujukʼ ona do sanam hoṛgeko baḍaea; okoeyakʼ bibek bạnukʼtako ar okoeyakʼ ontor goṛdhogetako onko do nonkageko maraokʼa; ar akoakʼ dhon do eṭakʼko lạgitʼko doho oṭokakʼa.

¹¹ Onko doko hudisa akoakʼ oṛakʼ duạr do tahengetakoa, ar tahen ṭhạ̃i hõ piṛhike piṛhi ṭikạu tahena, onate akoakʼ ńutumtege onko do sompotti reakʼ ńutumko emeda.

¹² Menkhan manwa do kisạ̃ṛ ar ạkilanko hoylenre hõ jaejug do bako tahena; uni do janwarko lekageye marao utạrokʼa.

¹³ Okoe apnar cetanreko bhorsakʼkan, ar okoe onkoakʼ kathako sãhãkʼakʼ kan, onkoakʼ dosa hõ onkage hoyokʼa. (Sela)

¹⁴ Bhiḍi palko cetʼleka niṭ akatʼ khạṛreko idi ocokʼ, onkage niṭ akatʼ patal purire onko hoṛ hõko idi ocokʼa; onḍe do gujukʼge onkoren gupiyicʼe hoyokʼa. Din reakʼ etohopʼrege Isor botoraekan hoṛ do onko cetanreko jitạukʼa; ar patal puri do onko hoṛkoakʼ hoṛmoe jomtakoa; onkoakʼ tahen reakʼ jaega do ar cetʼge baṅ tahena.

¹⁵ Menkhan patal puri reakʼ ti khon Isorge chaḍao reakʼ dam lekate ińe rukhiyạyińạ; uni do acʼ ṭhen khạṭigeye idiyińạ. (Sela)

¹⁶ Eṭakʼ hoṛe kisạ̃ṛ akana ńelte do alom botorokʼa, ar uniyakʼ gharońj reakʼ dhon sompotti ḍherlenre hõ alom botorokʼa;

¹⁷ ente gujukʼre uni do cetʼge bae iditora daṛeakʼa, uniyakʼ dhon sompotti do patal purite hõ baṅ calakʼa.

¹⁸ Uni do acʼakʼ jionre bhạgane hudisokʼre hõ ar jãhãegeye kisạ̃ṛlenre ar bhạganko metaere hõ,

¹⁹ enhõ uni do acʼren hapṛamko ṭhen calakʼtege hoyokʼtaea one onko do siń reakʼ marsa tisge bako ńelńam.

²⁰ Manwa do kisạ̃ṛ ar ạkilanicʼe hoylenre hõ Isor bae bujhạu daṛeaea; uni do janwarko lekageye marao utạrokʼa.