Sereńko 48 - সান্তালী বাইবেল

Isorakʼ nagraha Sion

¹ Aboren Isorakʼ nagrahare, ar uniyakʼ sonot burure, Probhu Isor doe maraṅgea ar joto khon bạ̃ṛti sarhao lek kanae

² Isorakʼ tahen jaega do ona Sion burure, ar coṭre benaoakʼ maraṅ rajakʼ nagraha do ńelokʼte ạḍi mońjgea; ona do goṭa dhạrtiye rạskạ ocoyeda.

³ Ona nagraha reakʼ raj dolanko do Isor acʼge gaṛ lekateye sodor akada.

⁴ Rajko do akoren palṭonko jarwakate mitʼ soṅgeteko laha idiyena;

⁵ ar ona nagraha ńelte onko doko comkao gotʼena ar ạḍi bạṛicʼko botorenteko dạṛkeda.

⁶ Botorte onko do onḍeko thar tharaoena ar bedonte gidrại janamede kan maejiu lekako hoyena.

⁷ Purub reakʼ kajak hoete cetʼleka uni do maraṅ maraṅ Tạrsis jahajkoe rạputʼletʼ, onkage onkoe marao giḍikatʼkoa.

⁸ Sanam daṛean Probhu Isorakʼ nagraha khon, aboren Isorakʼ nagraha tala khon okale ańjomakatʼ ona do mẽtʼtehõle ńelkeda; uni do jaejug hạbicʼ nagrahae benao akada.

⁹ E Isor, amakʼ oṛakʼrege amakʼ asambheṛ dulạṛ reakʼ kathagele ganḍonjoṅ kana.

¹⁰ E Isor, amakʼ reaṅ cetʼleka sanam manwako baḍaekan onkage amakʼ sarhao do dhạrti reakʼ mucạtʼ hạbicʼ menakʼa; amakʼ jojom ti do dhorom kạmi reakʼ daṛete perecʼgea.

¹¹ Amakʼ dhorom bicạr iạte Sion buru doe kusikʼma ar Jihudạ reakʼ atoko do rạskạte perejokʼma.

¹² E Jihudạren hoṛko, ape do Sion buru beṛhaete ạcur hijukʼpe, ar uniyakʼ gaṛko lekha legaepe;

¹³ Ona beṛhaeteakʼ dolanko ạri bạndhiyakʼpe, ar raj dolan reakʼ kandhako ńelpe, jemon aperen hoponko ṭhenpe lại daṛeakʼ.

¹⁴ Nui Isorge aboren do jaejugren Isor kanae; unige gujukʼ hạbicʼ horkoe udukʼ idiyabona.