Sereńko 47 - সান্তালী বাইবেল

Napṛakʼ utạr cakʼlaoicʼ

¹ E sanam jạtrenko, ape do thayoype; ar Isor ńutumte hulạs aṛaṅpe.

² Maraṅ Probhu Isor do botoranicʼ kanae; uni kangeae goṭa pirthimiren raj do.

³ Uni do eṭakʼ eṭakʼ jạtrenko abo gobolre, ar aboakʼ jaṅga latarreye dohoyetʼkoa.

⁴ Unige aboakʼ sompottiye begar dohoakada; ona do Jakobakʼ gorbo reakʼ kangea. (Sela)

⁵ Isor do hulạs aṛaṅre menaea, Probhu do sakwa reakʼ sạderege menaea.

⁶ Isor õṛhẽ sereńaepe, ar gun manao joharaepe; aboren raj õṛhẽ sereńaepe, ar unige gun manao joharaepe.

⁷ Isor kangeae goṭa pirthimiren raj do; onate unige õṛhẽ sereńaepe.

⁸ Sanam jạtrenko cetanre Isor doe rajokʼ kana; uni do acʼakʼ sonot siṅghạsonreye duṛupʼ akana.

⁹ Jạt jạtrenko modre okoe doko maraṅ hudạren kan, onko do mitʼ ṭhenko jarwakʼa, Onko do Abrahamren Isorren hoṛ menkategeko jarwakʼa. Dhạrtiren sanam disạm cakʼlaokoge Isor gobolren kanako, uni do sanamko khone maraṅgea.