Sereńko 46 - সান্তালী বাইবেল

Isor do abo tulucʼ menaea

¹ Isorge aboakʼ hirlạ ar daṛe; gạrre uni do gokʼṛoyicʼ kanae.

^2-3 Dhạrti dal dalaolenre hõ, buruko jalapurire dasao ńurlenre hõ, ona reakʼ dakʼko se rakapʼkate photolenre hõ ar ḍheoko reakʼ tạpiste buruko dal dalaolenre hõ, enhõ abo do oho bon botorlena.

⁴ Mitʼṭecʼ gaḍa menakʼa ar ona reakʼ nalako do Isorakʼ nagrahakoe rạskạ ocoyeda, ona sonot ṭhạ̃ikoge okare maraṅ Isorre tahenkan.

⁵ Isor do ona nagrahareye tahenkana, onate ona do ṭarhao tahena; ar aṅga torage Isor do onae goṛowakʼa.

⁶ Porjạtrenko doko kạumạueda, ar rajosṭiko do rạputʼena; Uni doe aṛaṅkeda, ar dhạrti do leyena.

⁷ Sanam daṛeanicʼ Isor do abo soṅgere menaea; Jakobren Isorge aboren gaṛ do. (Sela)

⁸ Dela hijukʼpe, Probhu Isorakʼ kạmiko ạribạndhipe, uni do dhạrtire nonosṭowakʼe ạguakada,

⁹ Uni do dhạrti reakʼ joto lạṛhạiye thir ocoyeda, uni do akʼe rạputʼ kaca kucạyeda, ar borlom doe kaṭra kuṭrạyeda, ar rãt gạḍi do seṅgelreye atar giḍiyeda.

¹⁰ Probhu Isore meneda, “Thirokʼpe; ar noa katha baḍaepe je, iń kangeạń Isor do; sanam jạtrenko do ińko sarhaoińạ, ar dhạrti hõ ińe sarhaoińạ.”

¹¹ Sanam daṛean Isor do abo soṅgere menaea; Jakobren Isorge aboren gaṛ do. (Sela)