Sereńko 45 - সান্তালী বাইবেল

Rajakʼ bapla sereń

¹ Ińakʼ ontor do bhage kathate cepel cepelokʼ kana; ar raj õnõṛhẽye lạgitʼ ińakʼ kobita do oḍokʼakana; ińakʼ alaṅ do cogoṛ olokʼicʼ akʼ kolom hoyakana.

² Am do manwako modre mońj utạricʼ kanam; amakʼ luṭikin reakʼ kathare do rasa dulogokʼkan leka; Isorakʼ jaejug reakʼ bhor do amrege ńurokʼ kana.

³ E birbanṭa, amakʼ ḍanḍare tarwaṛe toltam; ṭhonok ar mante sajaokʼme.

⁴ Sạriyakʼ, mạ̃hir ar dhorom secʼ amakʼ ṭhonokte jitạuicʼ leka mohnḍakʼme; ar amakʼ jojom ti do botoranakʼkoe kạmima.

⁵ Rajren bạirikoakʼ koṛamre amakʼ laser sar do bidokʼkana; ar amren bạiriko do amakʼ jaṅga latarreko ńurokʼkana.

⁶ E Isor, amakʼ siṅghạson do jug cetan jugge; ar amakʼ ḍanṭao do dhorom reakʼ ḍanṭaokana.

⁷ Am do dhoromem dulạṛeda ar bedhorom dom kurudakʼ kana; Onate Isor, amren Isor do, amren soṅgetenko khon hõ bạ̃ṛti hulạs do sunum leka am cetanreye dul akada.

⁸ Gondhoros, kunduru ar darcini reakʼ mahkaote amakʼ raj horokʼakʼ do mahkaokʼ kana; ar hạti sonḍa reakʼ raj dolanre taranakʼ banam do ame rạskạ ocoyetʼmea.

⁹ Amren bhodro maejiuko modre raj hoponerako hõ menakʼkoa, ar raj hoponera do Ophir reakʼ sonate sajkate amakʼ jojomsa aṛere menaea.

¹⁰ Ańjomme, E biṭi, moneyakʼme ar luturakʼme; ar amren hoṛ do hiṛińkakome; ar am babawakʼ oṛakʼ reakʼ katha hõ hiṛińkakʼme.

¹¹ Enḍekhan raj do amakʼ mońjtetʼreye hạ̃sakʼa; unige amren kisạ̃ṛ do, ar unige ḍobokʼaeme.

¹² Tur nagraharen hoponerako do sandesko ạgu daraya; ar ạḍi kisạ̃ṛ hoṛko do amakʼ dayako khoja.

¹³ Raj oṛakʼre raj hoponera do ạḍige mońje ńelokʼa; ar uniyakʼ horokʼ bandeakʼ do sona reakʼ sutạmte rokʼ galaṅ akana.

¹⁴ Noksa akatʼ horoakʼte uni do raj ṭhenko idiyea; ar uni tayomte soṅgeten kũạ̃ri kuṛiko hõ am ṭhenko idi ocokʼa.

¹⁵ Rạskạ ar hulạs salakʼ onko doko idi ocokʼa; ar onko do raj reakʼ dolanteko bolokʼa.

¹⁶ Amren hapṛamkoakʼ jaega do amren hoponkoakʼ hoyokʼa; ar manwako talare am do onkoren bicạrkom tearkoa.

¹⁷ Ar jạt jạtrenko ṭhen iń do amakʼ ńutumiń disạ ocomea; onate eṭakʼ eṭakʼ jạtrenko do jaejug hạbicʼ amko sarhaomea.