Sereńko 44 - সান্তালী বাইবেল

Rukhiyạ ńam lạgitʼ koejoṅ

¹ E Isor, sedaere aleren hapṛamko oktere okaṭakʼem cekaletʼ onko reaṅ katha ale do apnarakʼ luturtele ańjomleda.

² Am do amakʼ tite eṭakʼ jạtrenkom laga ńirketʼkote ona jaegare aleren hapṛamkom doholetʼkoa; am do onko hoṛko cetanre nosṭoakʼem ạguleda ar aleren hapṛamkom teṅgo keṭecʼ ocoletʼkoa.

³ Onko do akoakʼ tarwaṛete noa disạm do bako ạidạrian tahẽkana, ar akoakʼ daṛete hõ bako jitạu daṛeada; amakʼ daṛe, hẽ amakʼ maraṅ daṛete, ar amakʼ ṭhonoktege ona doko onkaleda, ente onkore amakʼ daya do tahẽkana.

⁴ E Isor, ińren raj do amge; Jakobakʼ jitạukʼ reakʼ do amgem bebosta akada.

⁵ Aleren bạiriko do amakʼ daṛetegele teṅgo daramkoa; ar okoe ale upạrteko teṅgokʼ onko do amakʼ jortegele lebetʼ gańjaokoa.

⁶ Ińakʼ akʼ cetanre iń do bạń bhorsakʼkana, ińakʼ tarwaṛe do bae jitạu oco daṛeạńạ;

⁷ Menkhan amge bạiriko cetanre alem jitạu ocoakatʼlea, ar ale upạrtenko do lajaorem paṛao ocoakatʼkoa.

⁸ Isor iạtege ale do jaogele gorbokʼ kana; jaejug ale do amgele sarhaomea. (Sela)

⁹ Menkhan ńitokʼ am dom bạgi giḍiakatʼlea ar lajaorem paṛao ocoakatʼlea; lạṛhạire aleren palṭonko sãote am do ar bam tahẽnkana.

¹⁰ Bạiriko samaṅ khonem pạc ocoketʼlea; ale upạrtenko do aleko luṭ akatʼlea.

¹¹ Samaṅe lạgitʼ tiyạkʼ idiye bhiḍi leka onkoakʼ tire am dom aṛakʼ akatʼlea ar eṭakʼ eṭakʼ jạtrenko talarem chirchạtur akatʼlea.

¹² Am do begor damtege amren hoṛkom ạkhriń akatʼkoa; ar noa iạte cetʼ amakʼ jãhãnakʼ lab hoyakantama?

¹³ Aḍepase jạtrenko ṭhen am do alem henosta ocoyetʼlea; ar beṛhaeten hoṛko ṭhen do landa dhudhutʼkom hoyocoakatʼlea.

¹⁴ Judạ judạ jạtrenko ṭhen aleakʼ ńutum do kạhtukgem hoyocoakada; ar hoṛko do ale ńelte bohokʼko rukuyetʼtakoa.

^15-16 Okoe ińko henostayedeń kan arko durnam edeńkan onkoakʼ katha iạte, ar okoe bạiriko iń cetanre hala ruạṛ lạgitʼko duṛupʼ akan onko iạte, iń do lajaoteń unum akana.

¹⁷ Noako ale cetanre paṛao akante, amle hiṛińakatʼmea ona do baṅa; ar amakʼ bondobosre bepạtiạr akae menakʼlea ona hõ baṅa.

¹⁸ Am khon aleakʼ ontor do baṅ pạc ruạṛ akantalea; ar amakʼ hor khon aleakʼ jaṅga do baṅ ocokʼ akana.

¹⁹ Menkhan am do enhõ nonkan mitʼ jaegare alem rạputʼ caba akatʼlea one okare toyokoakʼ ḍerakan; ar ale do kaṛaṅ ńutrem esetʼ ạcur akatʼlea.

²⁰ Aleren Isorle hiṛiń akade khan, ar debotako secʼ tile tiạr akatʼtale khan,

²¹ enḍekhan Isor do cetʼ ona bae baḍaekan tahẽkana? Uni ma aleakʼ ontor reakʼ jotowakʼge coṅe baḍaege.

²² Menkhan enhõ am lạgitʼge jao ghuṛi aleren jãhãe baṅ jãhãeko gocʼ ocokʼkana, ar hoṛko do gur ocokʼ bhiḍiko lekageko hudisetʼlea.

²³ E Probhu Isor, ebhenokʼme, cedakʼem jạpitʼ akada? Ma beretʼme, jaejug hạbicʼ do alom bạgi giḍilea.

²⁴ Cedakʼ mẽtʼãhã dom betʼ akatʼtama? Aleakʼ duk ar santao reakʼ katha do cedakʼem hiṛiń akada?

²⁵ Ale do dhuṛirele sombotʼ hape akana; ar aleakʼ hoṛmo do otre jalatʼ akantalea.

²⁶ Dela hijukʼme, ar goṛowaleme; amakʼ asambheṛ dayate chaḍaoleme.