Sereńko 43 - সান্তালী বাইবেল

Bondi dosare menae hoṛakʼ koejoṅ

¹ E Isor, dhorom reakʼ baṛe bicạrtińme, ar bedhorom jạtrenko upạrte iń secʼ katha roṛme; ar phạsiara ar bạṛicʼ hoṛkoakʼ ti khon hõ rukhiyạyińme.

² Ińren aotan gaṛren Isor dom amkangea; cedakʼ iń dom bạgi giḍiyedeń kana? cedakʼ bạirikoakʼ santao iạte monre duk doń asen baṛayeda?

³ Amakʼ marsal ar amakʼ sạriyakʼtetʼ baṛe imạńme; onage iń do hore udukʼạńma. Ar amakʼ sonot buruteye idiyińma one okare amem tahenkan,

⁴ jemon iń do Isorakʼ pinḍ ṭheniń sor daṛeakʼ. Unige ińren rạskạ ar suk do. E Isor, E ińren Isor, Iń do taranakʼ banamte amiń õṛhẽ sereńama.

⁵ E ińakʼ jiwi, cedakʼ am dom be as akana? Cedakʼ nunạkʼ dom cońcol akana? Isor cetanre bhorsa dohoyme, ente iń do arhõń sarhaoea; unige ińren babańcaoicʼ ar ińren Isor kanae.