Sereńko 41 - সান্তালী বাইবেল

Ruạkʼkan hoṛakʼ koejoṅ

¹ Bhạgangeae uni hoṛ, okoe do nacarko lạgitʼe dạndikʼkan; akalre Probhu Isor do uniye bańcaoea.

² Probhu Isor do uniye rukhiyạyea are bańcao dohoyea; disạmre uni do sukreye tahena. Ar uniren bạirikoakʼ tire uni do bae jimạyea.

³ Uni do ruạ kạhil iạte aṭetʼreye jalatʼlenre hõ Probhu Isor do jiwi raṛecʼe emaea; ar ruạkʼicʼ do aṭetʼ khone rakapʼ ạguiyea.

⁴ Ińiń menkeda, “E Probhu Isor, iń do am upạrteń kại akada; de dayakate bogeyińme.”

⁵ Ińren bạiriko do ińakʼ bhageakʼ baṅkateko mena, “Uni do tinreye gujukʼa? Ar tinre uniyakʼ ńutum do cabakʼtaea?”

⁶ Onkoren jãhãege iń ńeńelko hecʼlenre onko do iń tulucʼ bạṛicʼakʼko roṛa; ar iń upạrte nindạu reakʼ kathako jogaṛa ar bahrere senkate onako lại baṛaea.

⁷ Iń hirkhạwạń kanko do iń upạrteko khae khoyeda, ar onko do iń ạṛisiń reakʼko dạndikʼkana.

⁸ Onkoko meneda, “Unire jãhãn bạṛicʼakʼ paṛao akana, ar okareye ńurakan onḍe khon do bae rakapʼ daṛeakʼa.”

⁹ Okoe doe ińren dulạṛiạ gatekan, okoere ińakʼ nunạkʼ pạtiạu menakʼtiń, ar okoe do iń tulucʼe jom ńũiyetʼkan, uni hõ iń upạrte iḍiye tuletʼtaea.

¹⁰ Menkhan am do, E Probhu Isor, ińre dayakʼme; ar rakabińme, jemon onko cetanreń hala ruạr daṛeakʼ.

¹¹ Ińiń baḍaea am do ińre dhirpur akae menama, ente bạiri do iń cetanre bae jitạu daṛeada.

¹² Ińakʼ dhorom iạte am dom esetʼ ạcur akadińạ; am do jaejug lạgitʼ am samaṅrem doho akadińạ.

¹³ Pạhil khon mucạtʼ hạbicʼ Israelren Probhu Isorakʼge sarhao hoyokʼtae ma. Amen, amen.