Sereńko 40 - সান্তালী বাইবেল

Sarhao sereń

¹ Iń do Probhu Isor lạgitʼgeń koyokʼ horakatʼ tahẽkana. Uni do ińakʼe luturada, ar koejoṅe ańjomketʼtińạ.

² Uni doe rakapʼ ạgukedińa sasette perecʼ khạnduṛuṅ khon dalahe losotʼ reakʼ ghaḍlakʼ khonge. Uni do dhiri cetanreye teṅgokedińa ar keṭecʼ hasa cetanreye taṛam ocokedińa.

³ Uni do ińakʼ mocare nãwã sereńe emadińạ, aboren Isorakʼ sarhaoakʼ sereńge. Ḍher hoṛkoakʼ mẽtʼrege ona do paṛaokʼa ar monre botor hecʼakoa; onko do Probhu Isorreko bhorsakʼa.

⁴ Bhạgangeae uni hoṛ do, okoe do Probhu Isor cetanreye bhorsakʼ kan, ar onko secʼ bae ruạṛkan one onko bạḍại ar eṛeyakʼreko tahenkan.

⁵ E ińren Probhu Isor, ḍhergetama amakʼ hahaṛa kạmiko do! Ale lạgitʼ okaṭakʼem goṭa akatʼ! Onań roṛ sodorlere, ariń lạilere ona do tishõ baṅ mucạdokʼa. Ar am leka do okoe menaea?

⁶ Am do janwar dãṛẽ hõ bam khojkana, ar jeredokʼ samaṅokʼakʼ ar kại ńutumte dãṛẽ hõ bam khojkana; menkhan amakʼ katha ańjom lạgitʼ luturem emakawạdińa.

⁷ Ona iạteń menleda, “Nokʼõeiń hecʼ akana; ar sostorre do iń hijukʼ reaṅ ol menakʼa.

⁸ E ińren Isor, amakʼ sana leka calakʼge ińakʼ rạskạ do; ar amakʼ sanam hukumko do ińakʼ ontorre menakʼa.”

⁹ E Probhu Isor, maraṅ bạisire iń do amakʼ dhorom kạmi reaṅ iń lại jạhira; ar am dom baḍaege, iń do luṭikin bạń sikupʼetʼtińạ mente.

¹⁰ Amakʼ dhorom reakʼ katha do ińakʼ ontorre bạń oko dohoya; iń do amakʼ pạtiạr ar bańcao reakʼ kathań lại idiya; amakʼ asambheṛ dulạṛ ar pạtiạr reakʼ katha maraṅ bạisire bạń oko dohoya.

¹¹ E Probhu Isor, amakʼ mãyã iń khon alom sapʼ dohoytama; amakʼ asambheṛ dulạṛ ar pạtiạr do jao ghuṛige jemone rukhiyạyiń ma;

¹² ente aema muhinteń esetʼ ạcurakana; kại do ińe khudạu edeńkana ar ińreye hecʼ paṛao akana. Iń do bạń ńeńel kana; lekhare onako do ińakʼ bohokʼ upʼ khon hõ ḍhergea; dil do ar bạnukʼtińạ.

¹³ E Probhu Isor, dayakate bańcaoińme baṛe; E Probhu Isor, iń goṛowạń lạgitʼ dela usạrate hijukʼme.

¹⁴ Okoe do iń gojeń reakʼ kurumuṭure menakʼko onko jotoge lajao arko opomanokʼma; okoe ińakʼ sorbonasko khojkan onko do bohokʼ tumbutʼkateko ruạṛ calakʼma.

¹⁵ Ar okoe iń ńelteko men, “Besge hoyakana!” Onko do lajaokateko ruạṛ calakʼma.

¹⁶ Menkhan amakʼ sana leka calakʼkanko do amregeko kusikʼa arko hulạsokʼa; ar okoe amakʼ bańcaoko dulạṛetʼ onko do jaogeko men ma, “Probhu Isorakʼ sarhao hoyokʼtae ma!”

¹⁷ Iń do reṅgecʼ ariń nacargea, menkhan iń reaṅ do Probhu Isorgeye dạndikʼ kana. E ińren Isor, alom biloma amkangeam ińren gokʼṛoyicʼ ar babańcaoicʼ do.