Sereńko 4 - সান্তালী বাইবেল

Goṛo ńam lạgitʼ ạyupʼ koejoṅ

¹ E ińren Isor, amakʼ sana lekań calakʼkan ona dom udukʼ akawạdińa; ar amiń hohowamre roṛ ruạṛạńme baṛe. Iń do muhinteń esetʼ akana, menkhan am do sahẽtʼ reakʼ bhạgem emakawạdińạ. Dayawạńme, ar ińakʼ koejoṅ baṛe ańjomtińme.

² E manwa, ar tinạkʼ hạbicʼ iń dope henostayińạ? Ar tinạkʼ din bạṛicʼakʼpe dulạṛa ar tinạkʼ din eṛeakʼpe ńam baṛaea? (Sela)

³ Baḍae dohokakʼpe, Probhu Isor do acʼ sewawaeko acʼ lạgitʼgeye begar dohoakatʼkoa; ińiń hohowaere uni doe ańjomtińạ.

⁴ Edrete alope kạiya. Aṭetʼre giticʼkate mon ḍunḍhạutape ar hape akae tahenpe. (Sela)

⁵ Lek lekan dãṛẽko samaṅkope, ar Probhu Isorre bhorsa akae tahenpe.

⁶ Ḍher hoṛko mena, “Bhageakʼ do okoeye ńel oco daṛeabona?” E Probhu Isor, amakʼ daya reakʼ mẽtʼãhã do ale cetanre marsal leka baṛe rakapʼ aleme.

⁷ Ḍher phosol ar nãwã darkha rasa rakapʼlenre cetʼ leka hoṛkoko rạskạkʼ, ona khon ḍher rạskạte am do ińakʼ ontorem perecʼ akada.

⁸ E Probhu Isor, amge bin botortem doho akadińạ, onate iń do sulukteń jạpida.