Sereńko 39 - সান্তালী বাইবেল

Duke sahaoetʼ mitʼ hoṛakʼ kại aṅgoc

¹ Ińiń menkeda, “Iń calakʼ hor reaṅ iń do sontor akae iń tahena, jemon alaṅte aloń kại; ar tin hạbicʼ iń samaṅre bạṛicʼ hoṛko tahena un hạbicʼ ińakʼ moca doń gumạikakʼa.”

² Menkhan mocań bondketʼ tiń khan, okaṭakʼ bhageakʼkan ona bạń roṛletʼte, ińakʼ mon reakʼ kosṭo do ḍherena.

³ Iń do ontorre jala ehopʼạdińa; ar tinre mon monte katha roroṛiń ehopʼena unre seṅgel jolokʼ ehopʼena. Ar ona tayom doń menkeda,

⁴ E Probhu Isor ińakʼ sesokʼ do tis cabakʼa? Iń do ar tinạkʼ din jiwetʼ iń tahena; ar ińakʼ jion do tinạkʼ din lạgitʼ kana ona baṛe bujhạu ocoyińme.

⁵ Am do ińakʼ dinko bar muṭ ganem doho akatʼtińạ. Amakʼ mẽtʼre ińakʼ jion do cetʼhõ baṅkana. Sạrige michạgeako mitʼke mitʼ manwa do jãhãtinạkʼgeye teṅgo uricʼ akanre hõ. (Sela)

⁶ Manwa do umul lekae hijukʼa, ar calakʼ hõ umul lekage; uni do ạuṛiyakʼgeye kạumạu baṛaea; uni do dhone sońj joṅa menkhan ona okoeye joma ona do bae baḍaea.

⁷ “E Probhu Isor, enḍekhan iń do ar cetʼ reakʼ asteń tahena? Ińakʼ as joṅakʼ ma jotoge coṅ amrege.

⁸ Ińakʼ sanam ghạṭ khon chaḍaoiń me; ar buj thoṛagetako hoṛ ṭhen do alom cigạri ocoyińa.

⁹ Iń do thir hapege minạńa, moca do ar bạń cahabtińạ, ente amge noako dom hoyocoakada.

¹⁰ Iń cetan khon amakʼ sạjại do sahaṛkakʼme; amakʼ ti reakʼ dalte iń doń sesena.

¹¹ Kại iạte tinre manwako keṭecʼ kathatem ḍanṭaoetʼkoa, unre jạrdi leka onkoakʼ saj dom nosṭoyetʼtakoa; ente manwa do ekenko michạgea. (Sela)

¹² E Probhu Isor, ińakʼ koejoṅ ańjomtińme; ar goṛowạń lạgitʼ ińakʼ rakʼ joṅ ańjomtińme; ińakʼ mẽtʼ dakʼ ńelte am do alom thir hapekokʼa; ente ińren sanam hapṛamko cetʼlekako tahẽkan onkage ińhõ dhạrtire upriạ hoṛko leka minạńa.

¹³ Iń khon eṭakʼ secʼ beṅgedme, jemon ạuriń calakʼre, ar ạuriń uṭhạukʼre, arhõń kharsala daṛeakʼ.