Sereńko 38 - সান্তালী বাইবেল

Duke sahaoetʼkan hoṛakʼ koejoṅ

¹ E Probhu Isor, edrete alom ruhedińạ, ar raṅgao khạtirte alom ḍanṭaoińạ;

² Ente amakʼ sarko do ińre kiṛbitʼ akana, ar amakʼ ti do ińe sapʼ uricʼ akadińạ.

³ Amakʼ edre iạte ińakʼ hoṛmo do niphuṭ bạnukʼa, ar kại iạte ińakʼ jaṅko hõ nirại bạnukʼ anaṅ.

⁴ Ińakʼ bedhoromre iń doń unum akana; ona do nonkan bojha leka hoyakana ar bạń gokʼ daṛeakʼ kana.

⁵ Ińakʼ bebuj iạte ińakʼ ghao khon bạṛicʼge so oḍokokʼ kana, ar ona do seya akana.

⁶ Iń doń kubjạ akana, ar ạḍitetʼgeń kaba kubạ cabayena; goṭa din iń do monre duk dohokateń dãṛãn kana.

⁷ Ińakʼ ḍanḍare do jal jalaokʼkan hasoge menakʼa, ar ińakʼ horko do nirại bạnukʼtińạ.

⁸ Iń doń nijor akana, ariń rạputʼ akana, ar ontor reakʼ hasoteń kạulạ kạulikʼ kana.

⁹ E Probhu Isor, ińakʼ sanam khojogokʼakʼ dom baḍaegea; ińakʼ lolo sahẽtʼ hõ am ṭhen oko bạnukʼ anaṅ.

¹⁰ Ińakʼ koṛam do dhuk dhukokʼkan tińạ, ar daṛe hõ cabayentińạ, ar mẽtʼ hõ ńut akantińạ.

¹¹ Ińakʼ noa dosa ńelte gate peṛako do iń khon pharakreko tahenkana, ar ińren peṛa pạrbhạko hõ iń khonko pharakokʼ kana.

¹² Okoe do iń gojeńko menjoṅkan onko do iń lạgitʼ pạsiko oḍao akada; okoe iń hạneńko menjoṅkan onko do maraoiń reakʼ botorko udukʼạń kana; goṭa din onko do ṭhokayiń reakʼ phundiko aṭaoeda.

¹³ Iń doń kala akana, ar cetʼge bạń ańjomeda; ariń guṅgạ akana, ar cetʼge bạń roṛ daṛeakʼ kana.

¹⁴ Okoe bae ańjom ar okoeyakʼ mocare jãhãn ạnḍuṅteakʼ bạnukʼtae, onka lekage iń doń hoyakana.

¹⁵ E Probhu Isor, iń do am secʼ iń koyokʼ hor akada; E Probhu, ińren Isor, amgem roṛ ruạṛạńạ;

¹⁶ ente iń doń menleda, “Tinre jaṅga leńjedokʼtińạ unre ona iạte onko do alom rạskạ ocokoa, ar iń upạrte alom bạḍại ocokoa.”

¹⁷ Iń doń bhindạṛokʼ kana; ińakʼ kosṭo reakʼ katha do jaoge monre jagao ạńkana.

¹⁸ Ińakʼ dosiń aṅgocetʼ tińạ; iń kại iạte mon do bhabnate perecʼ akantińạ.

¹⁹ Ińren bạiriko do ṭaṭka arko daṛegea; ar okoe ạuṛiyakʼteko kurudạńkan onko doko ḍhergea.

²⁰ Iń do onkoń bhạlạileko khan onko do ińakʼ khutiytiń reakʼko kurumuṭuyeda; ar bhageakʼkoń ńam baṛaere onko do iń upạrteko teṅgon kana.

²¹ E Probhu Isor, am do alom bạgi giḍiwạńạ; E ińren Isor, iń khon pharakre alom tahena.

²² E Probhu Isor, ińren babańcaoicʼ, iń goṛowạń lạgitʼ usạra hecʼ godokʼme.