Sereńko 37 - সান্তালী বাইবেল

Bạṛicʼ hoṛ ar bhage hoṛkoakʼ ses dosa

¹ Am do bạṛicʼ hoṛko iạte alom jal jalaokʼa, se behok kạmiyetʼkanko ńelte alom hiskạkʼa;

² ente ghãs lekage onko do usạrateko rohoṛ kạrcubokʼa ar hạriạṛ nạ̃ṛĩ-sakam leka ḍher din do bako ṭikạu tahẽ daṛeakʼa.

³ Probhu Isorre biswạs dohoyme ar bhageakʼ kạmime; amakʼ disạmrege tahenme, ar pạtiạrte taṛamme.

⁴ Probhu Isor iạte hulạsokʼme; amakʼ mon reakʼ sana do unigeye purạutama.

⁵ Amakʼ jion hor reakʼ bhar do Probhu Isorrege dohoyme; ar unire bhorsa akae tahenme, khan unige jotowakʼe purạutama.

⁶ Unige amakʼ dhorom do marsal lekae jhak jhak ocoytama; ar amakʼ dhorom kạmiko do tikin reakʼ setoṅ lekae hoeocoya.

⁷ Probhu Isor samaṅre thir hape akan tahenme; ar uni ńel horre tahenme. Apnarakʼ kạmi purạu lạgitʼ okoe do bạṛicʼakʼko kạmire acʼakʼ mone lagaoetʼ, uni iạte am do alom jal jalaokʼa.

⁸ Edrekʼ do ikạkakʼme, hataṅ alom loloe tama; ar alom jal jalaokʼa, ente ona do eken bạṛicʼ secʼgeye ạyur idiya.

⁹ Bạṛicʼ hoṛ doko marao ocokʼa, menkhan Probhu Isorre okoeko bhorsakʼ kan onko do disạmko ạidạri joṅa.

¹⁰ Ar thoṛa ghạṛicʼ khange bạṛicʼko doko marao utạrokʼa; ar ńam baṛalekore hõ onko do bako sendra ńamokʼa.

¹¹ Menkhan mạ̃hir hoṛko do disạmko ạidạri joṅa; ar asambheṛ bhorko ńamte onko doko hulạsokʼa.

¹² Isor botoraeko upạrte bạṛicʼ hoṛko do phundiko aṭaoa ar onko upạrte ḍaṭako keṭer meṭertakoa.

¹³ Probhu Isor doe baḍaea bạṛicʼkoakʼ mucạtʼ din do sor hijukʼ kana, ar onatege uni do onko ńelteye landayeda.

¹⁴ Dukokʼko ar ṭonṭakʼkanko maraoko lạgitʼ, ar dhorom horte calakʼkan hoṛko gocʼko lạgitʼ, onko bạṛicʼ hoṛko do tarwaṛeko bocʼetʼtakoa ar akʼ ko gakʼ akatʼtakoa.

¹⁵ Menkhan onkoakʼ tarwaṛe do onkoakʼ koṛamrege bolokʼa ar onkoakʼ akʼ do rạpudokʼ takoa.

¹⁶ Ḍher bạṛicʼ hoṛkoakʼ do asambheṛ dhon menakʼa, menkhan Isor botoraeko do tinạkʼ menakʼtako onage ḍhera.

¹⁷ Bạṛicʼ hoṛkoakʼ ti do rạpudokʼ takoa, menkhan Probhu Isor botoraeko doe sapʼ sambṛaoetʼkoa.

¹⁸ Sạbit hoṛkoakʼ din hilokʼ reakʼ jion do Probhu Isore baḍaegea; onkoakʼ paona somppoti do jaejug hạbicʼ tahẽ akae tahena.

¹⁹ Dukokʼ dinre onko do lajaore bako paṛaokʼa; ar akal dinkore onko do jomakʼko ńama.

²⁰ Menkhan bạṛicʼ hoṛ doko maraokʼa; Probhu Isorren bạiriko do ṭạnḍi reakʼ saj leka, ar dhũạ lekako chanokʼa.

²¹ Bạṛicʼko do pańcako hataoa ar bako hala ruạṛa, menkhan Isor botoraeko do daya arko emokʼa.

²² Probhu Isor okoeye bhorako onko do ạidạriko ńama, menkhan okoe uniye sarapako onko doko marao ocokʼa.

²³ Probhu Isorge daṛean hoṛkoakʼ calakʼ hore ṭhikakoa; ar onkoakʼ jion ńelte uni doe kusikʼa.

²⁴ Gur lenre hõ onko do bako bhindạṛ tahena, ente Probhu Isorakʼ ti do onkoe sapʼ dohoyetʼkoa.

²⁵ Iń do juạniń tahẽkana, ar ńitokʼ doń haṛamena, menkhan Isor botoraeko doko bạgi ocoakana se onkoren bõsko doko kokoe kana nonka do bạń ńel akatʼkoa.

²⁶ Isor botoraeko do jao oktegeko dayakʼa ar pańcako emokʼa; onkoren bõsko do bhorko ńama.

²⁷ Bạṛicʼakʼ bạgiyakʼme ar bhageakʼ kạmime, onate jaejug hạbicʼ jiwetʼem tahena.

²⁸ Probhu Isor do dhorom bicạre dulạṛetʼa; ar acʼ botoraekanko do bae bạgi giḍikoa. Uni do jaejug hạbicʼe rukhiyạkoa, menkhan bạṛicʼ bõsrenko doe marao giḍikoa.

²⁹ Isor botorae hoṛko do disạmko ạidạrijoṅa ar onḍe do jaejug hạbicʼko tahena.

³⁰ Isor botoraekoakʼ moca do akel reakʼ kathae lại jạhira; onkoakʼ alaṅ do dhorom bicạr reakʼ kathageye roṛa.

³¹ Onkoren Isorakʼ hukum do onkoakʼ ontorre menakʼa; onkoakʼ jaṅga do baṅ leńjedokʼtakoa.

³² Bạṛicʼ hoṛko do Isor botoraeko lạgitʼ tãṛãkʼ akanko tahena, ar onko gocʼko reakʼko kurumuṭuiya.

³³ Menkhan Probhu Isor do bạṛicʼkoakʼ tire bae aṛakʼ giḍikakoa; bicạrre onko do bae dusi ocokoa.

³⁴ Probhu Isorre as doho joṅme, ar uniyakʼ horte taṛamme; uni doe maraṅmea ar am do disạmem ạidạrijoṅa. Ar bạṛicʼ hoṛko maraolenre hõ am dom ńelkoa.

³⁵ Bedhorom hoṛ do ạḍi haḍrap iń ńel akadea, nij hasare harakʼkan hạriạṛ dare leka uni doe jhạṛpạkʼ kana.

³⁶ Ona tayom uni doe marao cabayena, ar bae tahẽlena; iń doń ńam baṛakedea, ar bae ńamlena.

³⁷ Sạbit hoṛkoakʼ jion secʼ beṅgedme; ar onko dhorom hoṛko ńelkom. Okoe sulukko dulạṛetʼ onkoren bõs doko tahengea.

³⁸ Menkhan kạkạiko doko marao cabakʼa; onko bạṛicʼ hoṛkoakʼ bõs do ḍahao maraokʼa.

³⁹ Isor botoraeko reakʼ bańcaokʼ do Probhu Isor khonge hijukʼa; muhinre unige onkoren bhorsa doe hoyokʼa.

⁴⁰ Probhu Isorge onko doe goṛowakoa are rukhiyạkoa; bạṛicʼkoakʼ ti khon unige onkoe bańcaokoa, ar unige onko doe rukhiyạkoa, ente onko do unirege asrayko hatao akada.