Sereńko 36 - সান্তালী বাইবেল

Manwakoakʼ bạṛicʼtetʼ

¹ Bạṛicʼkoakʼ ghạṭ reaṅ ińakʼ ontor do Isorakʼ noa kathae ńam akada, “Bạṛicʼko do Isor bako botoraea.”

² Onko do ako reaṅ cikạ̃ṛ cikạ̃ṛ kathako roṛa, Isor do onkoakʼ kại bae sabtakoa, ar hirkhạ mẽtʼte hõ bae ńelkoa.

³ Onkoakʼ moca katha do bạṛicʼ ar phạsiạrate perecʼgea; Akelan hoṛko leka calakʼ doko bad akada, ar bhage kạmi hõ bako kạmikana.

⁴ Onko do aṭetʼre giticʼkate hõ bạṛicʼ phundiko aṭãoa; onko do bedhorom horre apnartetʼko jimạ akana ar bạṛicʼakʼ do bako hirkhạwakʼ kana.

⁵ E Probhu Isor, amakʼ asambheṛ dulạṛ do serma hạbicʼ menakʼa; ar amakʼ pạtiạr do coṭ rimilko hạbicʼge.

⁶ Amakʼ dhorom do Isorakʼ buruko lekana; amakʼ dhorom bicạr do athantar doreão leka. E Probhu Isor, manwa ar janwar jotoge jiwetʼ baṛe dohokom.

⁷ E Isor, amakʼ asambheṛ dulạṛ reakʼ dam do ohoge emlena; ar amakʼ phạ̃kṛạ̃kʼ umulre manwa do hirlạko ńama.

⁸ Amakʼ oṛakʼ reakʼ jomakʼ jomte onko doko tirpitokʼa; amakʼ hạ̃s reakʼ ar gaḍa reakʼem ńu ocokoa.

⁹ Am do jion reakʼ marsal kanam; amakʼ marsaltege ale dole marsalena.

¹⁰ Okoe amko baḍae akatʼme onkore amakʼ asambheṛ dulạṛ do jaejug hạbicʼ tahen ma; ar okoeyakʼ ontor khạṭige onko do jaoge amakʼ dhorom bicạrko ńama.

¹¹ Iń do bạḍạikoakʼ jaṅga latarre alom dohoyińạ; jemon bạṛicʼ hoṛko aloko laga daṛeạń.

¹² Okoe bạṛicʼakʼko kạmikan ńelme onko doko ńurhạ akana; onko doko giḍi ocoakana, ar bako beretʼ ruạṛ daṛeakʼa.