Sereńko 35 - সান্তালী বাইবেল

Goṛo ńam lạgitʼ koejoṅ

¹ E Probhu Isor, okoe doko iń upạrtenkan onko upạrte amhõ teṅgonme; ar iń upạrte okoeko lạṛhạikan onko upạrte amhõ lạṛhạime.

² Lạṭu ar kạticʼ am do banar ḍhalge sabme ar iń goṛowạń lạgitʼ hijukʼte teṅgonme.

³ Okoe ińko khudạu ạguyedeńkan, onkoakʼ hor do borlomte esedme. Ar iń mitạńme, “Ińge amakʼ bańcao do.”

⁴ Ar okoe iń gojeńko menjoṅkan onko do lajao ar bemanotreko paṛaokʼma; ar okoe do ińakʼ bạṛicʼ reakʼko soṛojontroyetʼ onko do opomankateko ruạṛ calakʼma.

⁵ Onko do hoete peṭecʼ lekako oṭaṅokʼma; Hẽ, Probhu Isorren goḍet do onkoe lagako ma.

⁶ Onkoakʼ hor do ńut ar leńjetʼge hoyokʼma; Hẽ, Probhu Isorren goḍet do onkoe khudạuko ma.

⁷ Onko do khanakha iń lạgitʼ gaḍare jhạliko oḍao akada, ar khanakha iń lạgitʼ khạṛiko la akada.

⁸ Onate ackage onkore ujạṛokʼ do hecʼ paṛaokʼma; ar oḍao akatʼ jhạlire akogeko jhạlikʼma, ona ujạṛokʼre akogeko paṛaokʼma.

⁹ Unre Probhu Isor iạte iń doń rạskạkʼa; ar uniyakʼ babańcaore iń doń hulạsokʼa.

¹⁰ Unre ińakʼ sanam hoṛmoe mena, “E Probhu Isor, am leka do ar okoe menaea? Amge dukokʼkanko do onkoren bạirikoakʼ ti khonem bańcaoetʼkoa ar okoe onko khonko daṛege; ar okoe doko luluṭko kan onkoakʼ ti khon am do dukokʼko ar ṭonṭakʼkan kom bańcaoetʼkoa.”

¹¹ Santaoko do eṛe goha emokʼ lạgitʼko hijukʼkana, ar oka bạń baḍae ona reaṅko jerayedeń kana.

¹² Bhạlại bodol onko do bạṛicʼakʼko halawạń kana; Hae, iń okoḍa do!

¹³ Enhõ onkoakʼ ruạkʼre iń do gõṛẽ kiricʼ iń horokʼleda, ar upạs dohokate ińakʼ jiwiń nandanketʼtińạ; menkhan ińakʼ koejoṅ do iń ṭhenge ruạṛ hecʼena.

¹⁴ Boeha ar gatekoń atʼketʼko leka onko lạgitʼ iń homor halaṅleda; ar homor halaṅ jokhecʼ eṅgattetʼe atʼen leka bohokʼiń kuḍburletʼtińạ.

¹⁵ Menkhan tinreń tohotʼena unre onko do kusiteko mitʼena. Ar iń sasetińko do iń ạuriń baḍaerege iń upạrteko mitʼ akana. Onko do jao ghạṛicʼko roṛ dogeń kana.

¹⁶ Hulạsokʼ jokhecʼ Isor bin botorae ṭiṭkạriko leka onko do iń upạrte togocʼ ḍaṭako ehopʼena.

¹⁷ E Probhu Isor, am do ar tinạkʼ din noakom ńela? Onkoakʼ santao khon rukhiyạyińme baṛe; noko dhạcri kulkoakʼ ti khon ińakʼ jiwi bańcaotińme.

¹⁸ Maraṅ bạisire iń doń sarhaomea ar aema hoṛko talare amiń õṛhẽ sereńa ma.

¹⁹ Eṛe iạte okoe do ińren bạiriko hoyakan onko ṭhen do alom landa dhutʼ ocoyińạ; ar khanakhate okoeko kurudạń kan iń upạrte mẽtʼ do alom ripitʼ ocoakoa.

²⁰ Onkoakʼ kathako suluk secʼ do bạnukʼa; disạmre sulukte okoeko tahenkan onko upạrte onko do phạsiạrate perecʼ monsubạ menakʼtakoa.

²¹ Iń upạrte luṭi binḍucʼkateko meneda, “Hẽ, ale do nij mẽtʼtegele ńel akada.”

²² E Probhu Isor, am do noakom ńeleda, am do alom thir hapekokʼa; E Probhu Isor, am do iń sorrege tahenme.

²³ E ińren Isor, E ińren Probhu, ma beretʼme, ar iń sejokʼme, ar iń secʼ katha roṛme.

²⁴ E Probhu, ińren Isor, dhoromte bicạrkạtińme baṛe; iń upạrte jemon aloko rạskạkʼ.

²⁵ Ar mon monte alom roṛ ocoakoa, “Bhagege! Okaṭakʼle khojkan tahẽkan onage hoyakana.” Onko do alom roṛ ocokoa, “Onko dole marao akatʼkoa mente.”

²⁶ Ińakʼ muhin ńelte okoeko rạskạkʼ kan onko sanamge lajao arko opomanokʼma; okoe iń cetante apnarko udugokʼkan onko do lajao ar opomanreko ńurokʼma.

²⁷ Dhorom horteń calakʼkan, noa katha ańjomkate okoeko rạskạkʼkan onko do kusiteko hulạsokʼma. Ar jao ghuṛigeko men ma, “Probhu Isorakʼge sarhao hoyokʼtaema; uni do acʼren gutikoakʼ bhạlại iạteye kusikʼ kana.”

²⁸ Iń do alaṅte amakʼ dhorom bicạr reakʼ kathań roṛa, ar goṭa dinge amiń sarhao sereńa ma.