Sereńko 34 - সান্তালী বাইবেল

Isorakʼ bhage iạte sarhao

¹ Iń do sanam okte Probhu Isoriń sarhaoea; ińakʼ mocare uniyakʼ sereń do mitʼtalaoge tahena.

² Iń do Probhu Isor iạteń gorbokʼ kana; ar ona ańjomte nindhạnko doko rạskạkʼ kana.

³ Iń sãote Probhu Isorakʼ ṭhonok reakʼ katha roṛpe; Dela, abo do mitʼ sãote uni bon sarhaoe ma.

⁴ Iń do Probhu Isoriń hohowadea, uni doe ańjomketʼtińạ; ar ińakʼ sanam botor khon uni doe bańcaokedińa.

⁵ Hoṛko do tinre uni secʼ pạtiạr salakʼko beṅgeda unre onkoakʼ mẽtʼãhã do kharsalakʼtakoa; onkoakʼ mẽtʼãhã do baṅ lajao ocokʼtakoa.

⁶ Nui nacaricʼ do Probhu Isore hohoadea; ar Probhu Isor do uniyakʼe ańjomketʼtaea ar sanamakʼ kosṭo khon uniye bańcaokedea.

⁷ Okoe do Probhu Isorko botorae kan Probhu Isorren goḍet do onko beṛhaeteye ḍerakʼkana ar onkoe rukhiyạyetʼkoa.

⁸ Cakha ạikạukate ńelpe Probhu Isor doe bhagegea; bhạgangeae uni hoṛ do, okoe do unireye hirlạkʼkan.

⁹ E Probhu Isorren hoṛko, ape do uni botoraepe, ente okoe uniko bhoktiae kan onko do cetʼ okulạnge baṅ hoyokʼtakoa.

¹⁰ Juạn dhạcri kulkoakʼ do jomakʼ reakʼ ṭonṭa hoyokʼkana, onko do reṅgecʼteko kosṭokʼkana; menkhan okoe Probhu Isorakʼ sana lekako calakʼ onko do bhageakʼte bako ṭonṭakʼa.

¹¹ E gidrạko, dela hijukʼpe, ar ińakʼ katha ańjompe; iń doń cetʼapea cetʼ lekate Probhu Isorpe bhoktiaea mente.

¹² Ape modre noa jion khemao do okoeye menetʼkana? Ar suk jomkate ḍher din bahaokʼ lạgitʼ do okoye khojkana?

¹³ Enḍekhan uni do alaṅte bạṛicʼ katha aloe roṛma, ar luṭite eṛeakʼ kathako aloe oḍok ocoyma.

¹⁴ Bạṛicʼ kạmi khon sạṅgińre tahenpe, ar bhageakʼ kạmipe; suluk lạgitʼ ahkaokʼpe ar ona do alope aṛakʼ giḍikakʼa.

¹⁵ Dhorom reakʼ horte okoeko calakʼkan onkore do Probhu Isorakʼ mẽtʼãhã menakʼa; onkoakʼ koejoṅ ańjom lạgitʼ uniyakʼ lutur do jhicʼge menakʼtaea.

¹⁶ Okoe bạṛicʼakʼko kạmikan Probhu Isor do onko upạrteye teṅgona, jemon dhạrti khon onkoakʼ ńutum cabakʼtako.

¹⁷ Okoe dhorom reakʼko kạmikan Probhu Isor do onkoakʼ rakʼe ańjometʼtakoa; ar joto lekan kosṭo khon uni doe rukhiyạyetʼkoa.

¹⁸ Okoeyakʼ mon rạputʼ akantako Probhu Isor do onko ṭhengeye tahena; okoeyakʼ ontor talga tạwạkʼ akan onko doe bańcaokoa.

¹⁹ Okoe dhorom horteye calakʼ uniyakʼ do muhinko ḍhergere hõ onako khon Probhu Isor doe bańcaoea.

²⁰ Uni do uniyakʼ sanam jaṅkoe rukhiyạitaea, onako do mitʼṭecʼ hõ bae rạputʼ ocowakʼa.

²¹ Bedhoromkoakʼ gujukʼ do bạṛicʼakʼ tire; ar okoe dhorom hoṛko hirkhạwako kan onko doko bicạr dusi ocokʼa.

²² Probhu Isorge acʼren golamkoe chaḍaoetʼkoa; okoe unireko hirlạkʼkan okoehõ onko do sạjại bako ńama.