Sereńko 33 - সান্তালী বাইবেল

Sarhao reakʼ sereń

¹ E Isor botoraekan hoṛko, Probhu Isorakʼko reaṅ ape do hulạsate sereńpe; uni sarhao sereńae do khạṭi hoṛkoakʼ kạmikangea.

² Peṛesaṅ banamate Probhu Isor do gun manao joharae pe; ar gel taranakʼ banamkote õṛhẽ sereńaepe.

³ Uni lạgitʼ nãwãnakʼ sereńko sereńpe, ar sereń banamte andoṛaepe.

⁴ Probhu Isorakʼ katha do sạrigea, uni do sanam kạmireye pạtiạrgea.

⁵ Probhu Isor do dhorom kạmi ar dhorom bicạrgeye dulạṛeda; goṭa dhạrtirege uniyakʼ dulạṛ do menakʼa.

⁶ Probhu Isorakʼ kathatege serma do sirjạu akana; ar ona reakʼ sanamakʼ do uniyakʼ sahẽtʼte sirjạu akana.

⁷ Uni do jalapuri reakʼ dakʼkoe jarwa ocoyetʼa, ar judạ judạ murạikore onako dakʼe dohoyeda.

⁸ Dhạrtiren sanam hoṛge Probhu Isorko botorae ma, ar prithimiren sanamkoge uni botorteko thartharaokʼma;

⁹ Ente uni doe menkeda ar sanamakʼ do sirjạuena; uni doe hukumkeda ar sanamakʼ tearena.

¹⁰ Sanam jạtrenkoakʼ goṭawakʼge Probhu Isor doe ạuṛiyakʼ ocoytakoa; ar onkoakʼ hudisko hõ bae jo baha ocoytakoa.

¹¹ Menkhan Probhu Isorakʼ goṭawakʼ do jaejug hạbicʼ tahena; uniyakʼ mon do jug cetan juge tahentaea.

¹² Bhạgangeako onko jạtrenko do, okoeren Isor doe Probhu kan; Bhạgangeako onko hoṛ do, okoe do acʼakʼ nij ạidạri menteye bachao akatʼko.

¹³ Probhu Isor do serma khon latarteye oyoṅkeda ar sanam manwakoe ńelketʼkoa.

¹⁴ Okoe dhạrtireko girobasokʼ kan onko do acʼakʼ tahen ṭhạ̃i khone beṅgetʼako kana.

¹⁵ Sanamkoakʼ ontor uni doe teareda; ar onko okako cekae ona joto doe bujhạueda.

¹⁶ Maraṅ palṭon phạdko tahenre hõ raj do bae rukhiyạ daṛeakʼa; ar maraṅ daṛe tahentaere hõ bir banṭa hoṛ do bae rukhiyạ daṛeakʼa.

¹⁷ Rukhiyạ ńam lạgitʼ sadom cetan reakʼ hirlạ hõ ạuṛiyakʼgea; maraṅ daṛe tahẽlen khan hõ sadom do bae rukhiyạ daṛeaea.

¹⁸ Menkhan Probhu Isorre okoeyakʼ botor menakʼ, ar uniyakʼ dulạṛre okoe asko dohoyetʼ, onko cetanre uniyakʼ daya do tahẽnkana;

¹⁹ jemon moron khon onkoakʼ jiwi rukhiyạkʼtako ar akalre jiwetʼe doho daṛeako.

²⁰ Abo do Probhu Isor lạgitʼge bon ńel horeda; uni kangea aboren goṛoyicʼ ar ḍhal do.

²¹ Unirege aboakʼ mon do rạskạkʼ kana, ente abo do uniyakʼ ńutumre bon bhorsa akana.

²² E Probhu Isor, alere amakʼ dulạṛ baṛe tahenma, ente ale do amregele as akana.