Sereńko 32 - সান্তালী বাইবেল

Kại aṅgoc ar ikạ

¹ Bhạgạngeae uni hoṛ, one okoeyakʼ ghạṭko ikạ akantae, ar okoeyakʼ kạiko dapal akantae.

² Bhạgangeae uni hoṛ, one okoeyakʼ dosko Probhu Isor doe ikạ akatʼtae, ar ontorre jãhãn eṛeteakʼ bạnukʼtae.

³ Iń do tinre kại bạń aṅgoc akatʼtiń tahẽkana unre goṭa dingeń hae haeyokʼkan tahẽkana ar ińakʼ jaṅko do heṛokʼkantiń tahẽkana;

⁴ ente siń ar ńindạ amakʼ ti do unre iń cetanre hamalge tahẽkana; ar setoṅ din reakʼ dãk leka ińakʼ hoṛmo reakʼ daṛe hõ komae idikʼkan tahẽkana. (Sela)

⁵ Unre ińakʼ kại do am ṭheniń aṅgockeda, ińakʼ bedhorom do ar bạń oko doholeda. Ińiń menkeda, “Ińakʼ ghạṭko reakʼ katha do ińren Probhu Isor ṭheniń aṅgoca.” Ar am do ińakʼ ghạṭkom ikạkatʼa. (Sela)

⁶ Ona iạte tinạkʼ din ạt menakʼ unạkʼ din amko botoramkan hoṛ do am ṭhenko koejoṅ ma; sạrige, muhin do banbạsi dakʼleka tinre hijukʼa unre ona do onko baṅ paṛao akoa.

⁷ Amge ińren danaṅ akan ṭhạ̃i do. Amge gạr khonem horho jaṅge akadińạ chaḍaokʼ reakʼ hulạs sereńte amgem esetʼ ạcur akadińạ. (Sela)

⁸ Iń Probhu Isorge bud ar akeliń ema ma ar okaṭakʼ horte calakʼ hoyokʼtam onań udukʼama; ariń beṅgetʼama ariń solhawama.

⁹ Sadom se gadha leka do alope hoyokʼa one onko do bujhạu reakʼ daṛege bạnukʼtako; onko do mocare jhinkatege kạbuko hoyokʼa, ar baṅkhan ape ṭhen do bako sorokʼa.

¹⁰ Bedhoromicʼ do ạḍi jala hoyaea, menkhan okoe Probhu Isorre hirlạ akane tahen uni do Probhu Isorakʼ dayageye esetʼ ạcurea.

¹¹ E Isor botoraekan hoṛko, Probhu Isorge aperen rạskạwạnicʼe hoyokʼma, uni iạtege ape do kusikʼpe; ar ontorre okoepe khạṭige, ape sanamkoge hulạsate sereńpe.