Sereńko 31 - সান্তালী বাইবেল

Isorre bhorsakʼ reakʼ koejoṅ

¹ E Probhu Isor, iń do amregeń hirlạ akana; lajaore tishõ alom paṛao ocoyińạ; amakʼ dhorom bicạr iạte rukhiyạyiń me.

² Iń secʼ amakʼ lutur oḍaotam; ar bańcaoiń lạgitʼ usạrate hijukʼme. Iń rukhiyạyiń lạgitʼ asray cạṭạnige hoyokʼme ar ińakʼ aotan gaṛ hõ hoyokʼme.

³ Amge ińren huṭupʼ dhiri ar aotan gaṛ do; amakʼ ńutum rukhiyại lạgitʼ horem udukʼạńạ arem ạyur idiyińạ.

⁴ Iń lạgitʼ danaṅre oḍao akatʼ jhạli khon am do rukhiyạyińme, ente am kangeam ińren aotan gaṛ do.

⁵ Amakʼ tire ińakʼ jiwiń jimạyetʼtińạ, ente E Probhu, pạtiạranicʼ Isor, amgem chaḍao akadińạ.

⁶ Okoe eṛe boṅgako ḍobokʼ akokan onko doń hirkhạwako kana; menkhan iń do Probhu Isorregeń bhorsakʼ kana.

⁷ Amakʼ asambheṛ dayań ńamakatʼte iń doń rạskạkʼ kana, ariń hulạsokʼ kana; ente am do ińakʼ dukem ńel akada, ar ińakʼ kosṭo reakʼ katha hõm baḍaekana.

⁸ Bạirikoakʼ tire am do bam dohoakadińạ, bickom mitʼṭecʼ phaelao jaegarem teṅgo akadińạ.

⁹ E Probhu Isor, dayawạńme baṛe, ente iń do kosṭore minạńa; dukte ińakʼ mẽtʼ ar hoṛmo do laṅga idikʼ kantińạ.

¹⁰ Hasote ińakʼ jiwi do oḍokokʼ kana, ar hae haete umer hõ parom calakʼkan tińa; bedhorom iạte ińakʼ daṛe do komao idikʼ kana, ińakʼ jaṅko do nijor caba akana.

¹¹ Bạiriko ṭhen iń do henostageń hoyakana, bạ̃ṛtikaete ińren gateko ṭhen. Ar ńepel oprom hoṛko ṭhen do torasge; kulhireko ńelliń khan onko doko ńir pharakokʼkana.

¹² Gocʼ hoṛ cetʼ lekako hiṛińokʼ onkage onko do ińko hiṛiń akadińạ; iń do rạputʼ bhajan lekań hoyakana.

¹³ Iń reaṅ ạḍi hoṛko oktayetʼkan ona hõń ańjometʼgea, iń beṛhaete do botorge menakʼa. Onko do iń upạrte mitʼ sãoteko solha joṅkana, ar gojeń lạgitʼko soṛojontro kana.

¹⁴ Menkhan E Probhu Isor, iń do amregeń hirlạ akana; ariń meneda, “Am kangeam ińren Isor do.”

¹⁵ Amakʼ tirege ińakʼ okteko do; okoe ińko khudạuedeń kan onko bạirikoakʼ ti khon amge bańcaoińme baṛe.

¹⁶ Amren golam cetanre mẽtʼãhã marsal ocoytam; amakʼ dayate rukhiyạyińme.

¹⁷ E Probhu Isor, iń doń hohoakawatʼmea; lajaore alom paṛao ocoyińạ; bedhoromkoge boroṅ lajaoreko paṛaokʼma, onko do hape akae patal puriteko ńurokʼma.

¹⁸ Bạḍại ar hirkhạ salakʼ okoe do dhorom hoṛko upạrte bemanot kathako roṛ. Onkoakʼ eṛe luṭi do guṅgạkʼtako ma.

¹⁹ Amakʼ bhạlạiyteakʼ do samani maraṅ! Am botoram kanko lạgitʼge ona dom dohoakada; amre hirlạ akanko do amgem bhạlạiyetʼkoa, ona do sanamko samaṅrege.

²⁰ Onko do amakʼ mẽtʼãhã danaṅre dohokom manwakoakʼ soṛojontro khon hõ danaṅ kom; jhogṛa reakʼ reṭe peṭeko khon amakʼ hirlạrege begar dohokom.

²¹ Probhu Isorakʼge sarhaokʼ hoyokʼtae ma. Pạcrianakʼ nagraha khon uniyakʼ dulạṛ do hahaṛageye udukʼ akawạdińạ.

²² Iń do botorteń menleda, “Am ṭhen khon iń doń begar akana.” Menkhan goṛo ńam lạgitʼ tinreń hohowatʼmea unre am do ińakʼ nehõrrem ańjomketʼtińạ.

²³ E sanam Isor bhokti hoṛ, ape do Probhu dulạṛepe biswạsiko do Probhu Isorgeye rukhiyạkoa menkhan phulạukʼkanko do purạteye sạjạikoa.

²⁴ Ape okoe do Probhu Isor cetanrepe hirlạ akan ape do monre daṛe dohoype ar dil joṅpe.