Sereńko 30 - সান্তালী বাইবেল

Gunmanao reakʼ koejoṅ

¹ E Probhu Isor, amiń sarhaomea, ente amgem rakapʼ ạgu akadińạ; ińren bạiriko do iń upạrte bam rạskạ oco akatʼkoa.

² E Probhu, ińren Isor, goṛowạń lạgitʼ iń hohowatʼmere am dom boge utạrkedińa.

³ E Probhu Isor, am do patal puri khonem rakapʼ ạgu akadińạ; ar amgem bańcao doho akadińạ jemon ona khạndṛuṅre pheḍokʼ alo lagaoạń.

⁴ E Probhu Isor botorae kanko, ape do uni sereńaepe; ar uni sonottetʼ reakʼ sarhaotaepe;

⁵ Ente uniyakʼ edre do ḍher ghạṛicʼ baṅ tahenkana; uniyakʼ dayatege jion do ńamokʼ kana. Ar ńindạge eken rakʼ rakʼte paromokʼ kana, menkhan rạskạ do setakʼrege seṭerokʼ kana.

⁶ Iń do ińakʼ nirại dinreń menetʼ tahẽkana, okoe hõ iń do bae lewe daṛeạńạ.

⁷ E Probhu Isor, am do dayate ińakʼ buru do kajaktem teṅgo ocoakatʼa, menkhan am do mẽtʼãhãm danaṅketʼtam khan, iń doń keklesetʼena.

⁸ E Probhu Isor, amgeń hohowatʼme tahẽkana; ińren Probhu Isor ṭhen nehõrkateń menleda,

⁹ “Ińakʼ gujukʼre se patal puriteń calakʼre do cetʼ labtiń? Dhuṛi do cetʼ ame sarhaomea?

¹⁰ E Probhu Isor, ańjomtińme, ar ińre dayakʼme; E Probhu Isor, amge goṛowạńme.”

¹¹ Ińakʼ homorokʼ bodolte am do enecʼjoṅem pherao ạdińa; ar gõṛẽ kicricʼem raṛaketʼtińte rạskạ dom oyo ạdińa,

¹² Jemon ińakʼ ontor hape alo tahentiń bickom am lạgitʼgeń sereń. E Probhu, ińren Isor, iń do jaejug amiń sarhaomea.