Sereńko 3 - সান্তালী বাইবেল

Goṛo ńam lạgitʼ setakʼ koejoṅ

¹ E Probhu Isor, ńelme, ińren bạirikoakʼ lekha do tinạkʼ gan. Ńelme, iń upạrte tinạkʼ gan hoṛko teṅgo akana.

² Ḍher hoṛge iń reakʼko roṛeda, “Isor do uni bae rukhiyạyea.” (Sela)

³ Menkhan E Probhu Isor, am do beṛhaete ḍhal leka menama. Amge ińakʼ ṭhonok do ar amge ińakʼ bohokʼem rakapʼ ocoakatʼtińạ.

⁴ Iń do ãṭ aṛaṅte Probhu Isoriń hohowae kana. Uni do acʼakʼ sonot buru khone roṛ ruạṛạńạ. (Sela)

⁵ Iń doń gitijokʼkana, ariń jạpitʼeda ariń ebhenokʼkana, ente Probhu Isorge iń doe sambṛaoedeń kana.

⁶ Iń upạrte ar iń beṛhaete hajar hajar hoṛko teṅgo akana, menkhan onko do bạń botorako kana.

⁷ E Probhu Isor, dela hijukʼme; E ińren Isor, bańcaoiń me. Am do ińren bạiriko jambereyem ghạletʼkoa ar bạṛicʼ hoṛkoakʼ ḍaṭa dom rạputʼ giḍikatako kana.

⁸ Babańcao do Probhu Isorakʼ kạmi kangea, ar amren hoṛko cetanre amakʼ bhor baṛe tahen ma. (Sela)