Sereńko 27 - সান্তালী বাইবেল

Sarhao reakʼ koejoṅ

¹ Probhu Isorge ińakʼ marsal ar ińren babańcaoicʼ, Iń do okoeyiń botoraea? Probhu Isorge ińakʼ jion reakʼ gaṛ do, ar okoe ńelte botorteń thar tharaokokʼa?

² Bạṛicʼ hoṛ do ińakʼ jelko joma mente tinreko hecʼ sorokʼa unre iń upạrtenko ar ińren bạiriko doko tohotʼ gurokʼa.

³ Palṭon phạdko ińko esetʼ ạcur lińre hõ, enhõ ińakʼ mon do baṅ botorokʼtińạ; ar iń upạrte lạṛhại ehopʼlenre hõ enrehõ iń do bhorsa do tahentińgea.

⁴ Probhu Isor ṭhen mitʼṭecʼ iń nehõrokʼ kana; ar okaṭakʼ iń khojokʼ kan ona do niạge ińakʼ goṭa jionre jemon Probhu Isorakʼ oṛakʼreń tahẽdaṛeakʼ, ar uniyakʼ ṭhonokiń ńel daṛeakʼte ona mundilre uni reaṅiń dhen daṛeakʼ;

⁵ Ente muhin hilokʼre uni do acʼakʼ ona gaṛre nirạiteye dohoyińạ, ar acʼakʼ ona tạmbureye oko dohokạńạ, ar ḍuṅgri cetanre uni doe rakabińạ.

⁶ Okoeko bạiriko esetʼ ạcur akadiń unre onko khon ińakʼ manot do arhõ ḍherokʼtińạ; iń do uniyakʼ oṛakʼre ãṭ aṛaṅate aema lekan dãṛẽkoń samaṅa; ar Probhu Isor lạgitʼ iń õṛhẽ sereńa ariń sarhaoea.

⁷ E Probhu, amiń hohowamre ańjomtińme, ar dawayạńme baṛe, ariń hohowamre roṛ ruạṛạńme.

⁸ Ińakʼ ontor do noa kathageye meneda, “Ape do iń hohowạńpe.” E Probhu Isor, iń do amiń hohowama.

⁹ Iń khon amakʼ mẽtʼãhã alom bedtama, ar edrete amren golam do alom laga ńireńa; amge ińren goṛoyicʼem tahẽ hecʼakana. E Isor, ińren babańcaoicʼ, iń do alom bạgiwạńạ, ar alom giḍi sayeńa.

¹⁰ Ińren go-baba do ińkin bạgi giḍiyińre hõ Probhu Isor do ińe hạr sãohãyińạ.

¹¹ E Probhu Isor, amakʼ hor udukʼạńme baṛe; ar ińren bạiriko iạte amakʼ suṛucʼ horte ạyurińme.

¹² Ińren bạirikoakʼ monejoṅakʼre alom alaeyińạ, ente eṛe gohako do iń upạrteko teṅgo akana; onkoakʼ sãhetʼ sãote santao do oḍokokʼ kana.

¹³ Probhu Isorakʼ emakʼ bhageakʼ do jiwetʼko modregeń ńel ńama. Noa katha bạń pạtiạuakʼ khan enḍekhan ińakʼ do cetʼ hoyokʼa?

¹⁴ Ape do Probhu Isor cetanre as dohojoṅpe; monre daṛe ar dil baṛe dohoytape ar Probhu Isorre as akae tahenpe.