Sereńko 26 - সান্তালী বাইবেল

Mitʼṭen bhage hoṛ reakʼ koejoṅ

¹ E Probhu Isor, dhorom horre minạń ona baṛe udukʼ akome, ente iń do sạbit colonreń taṛameda; ar Probhu Isorregeń bhorsakʼ kana.

² E Probhu Isor, iń do khạṭi mente sạbud ocoyińme; ar biḍạu aṭkarińme, ińakʼ mon ar ontor baṛe biḍạutińme;

³ ente amakʼ asambheṛ dulạṛ do jao ghuṛi ińakʼ mẽtʼãhã samaṅrege menakʼa; ar amakʼ pạtiạr reakʼ katha disạkate iń doń taṛameda.

⁴ Iń do eṛe hoṛko tulucʼ bạń duṛubokʼkana, ar bhõnḍko sãote hõ bạń gatekʼ kana.

⁵ Ar okoeko bạṛicʼakʼko kạmikan onko doń hirkhạwako kana; ar bedhorom hoṛko sãote hõ bạń duṛupʼ kana.

⁶ E Probhu Isor, iń do miridoste tikiniń ạrupʼtińạ ar amakʼ pinḍ beṛhaeteń ạcur hijukʼa,

⁷ jemon ãṭ aṛaṅteń sarhao sereń daṛeam, ar amakʼ sanam hahaṛa kạmi reakʼ kathań roṛ daṛeakʼ.

⁸ E Probhu Isor, am oka oṛakʼrem tahenkan, onḍege amakʼ ṭhonok hõ tahẽnkana, ar ona ṭhạ̃i do ińiń kusiyakʼ kana.

⁹ Kại hoṛko tulucʼ alom samṭao seledińạ; okoe mãyãm joroyko kusiyakʼkan, onko sãote hõ alom seledińạ.

¹⁰ Onkoakʼ tire do bạṛicʼ pontha menakʼa, onkoakʼ jojom ti do ghuste perecʼgetakoa.

¹¹ Mekhan iń do sạbit colonreń taṛameda; onkoakʼ ti khon chaḍaoińme, ar dayawạńme baṛe.

¹² Iń do soman jaegareń teṅgo akana; ar joroko samaṅrege Probhu Isoriń sarhaoea.