Sereńko 25 - সান্তালী বাইবেল

Ạyur ar rukhiyạ ocokʼ reakʼ koejoṅ

¹ E Probhu Isor, ińakʼ jiwi do am secʼ iń rakapʼetʼ tińạ.

² E ińren Isor, am cetanregeń bhorsa akana, am do lajaore alom paṛao ocoyińạ; ińren bạiriko jemon iń upạrte hulạsokʼ reakʼ ạt aloko ńam.

³ Okoe amre bhorsae dohoyetʼkan uni do bae lajao ocokʼa, menkhan okoe ạuṛiyakʼteko chol kopoṭetʼ onkoge lajaoreko paṛaokʼa.

⁴ E Probhu Isor, amakʼ suṛucʼ horko baḍae ocoyińme, ar amakʼ horte calakʼ baṛe cetʼạńme.

⁵ Amakʼ sạriyakʼre ạyurińme ar cetʼạńme, ente ińren babańcaoicʼ Isor dom am kangea; ar amrege sanam ghạṛicʼ iń bhorsakʼ kana.

⁶ E Probhu Isor, amakʼ mãyã ar khạndri dulạr reakʼ katha am do alom hiṛińa; onako do jug khonakʼge menakʼtama.

⁷ Ińakʼ koṛa umer reakʼ kại ar am upạrte hul reakʼ katha do alom disạ dohokakʼa; amakʼ asambheṛ dulạṛ iạte disạyińme baṛe, ente E Probhu Isor, am dom bhagegea.

⁸ Probhu Isor doe bhagegea are bhạlạiyicʼ kana, onate acʼakʼ hor reakʼakʼko uni do kại hoṛkoe cetʼ akokana.

⁹ Uni do nindhạnko dhorom horteye idikoa ar acʼakʼ hor reaṅe cetʼakoa.

¹⁰ Probhu Isorakʼ bondobos ar ạn lekate okoeko calakʼkan, onko ṭhen uniyakʼ sanam hor do asambheṛ dulạṛ ar pạtiạrte perecʼgea.

¹¹ Ińakʼ bedhorom reakʼ bojha do ḍhergea, onate E Probhu Isor, amakʼ ńutum rukhiyạitam lạgitʼ ińakʼ ona bedhorom baṛe ikạ kạtińme.

¹² Okoe kanae uni hoṛ, okoe do Probhu Isore botorae kan? Ar okaṭakʼ hor bachao hoyokʼtaea ona do unigeye udukʼaea.

¹³ Uni do sulukte acʼakʼ jione khemaoa, ar uniren bõsko do disạmre ạidạriko ńama.

¹⁴ Probhu Isor okoeko botorae kan onko ṭhenge uni do acʼakʼ monsubại sodortaea, ar acʼe dohoakatʼ bondobose baḍae ocokoa.

¹⁵ Ińakʼ mẽtʼ do siń sạṭupʼ Probhu Isor secʼge menakʼa, ente unige Soetanakʼ jhạli khon jaṅgae chaḍaotińạ.

¹⁶ Iń secʼ ạcurokʼme ar dayawạńme, ente iń do eskar ariń bạpuṛicʼgea.

¹⁷ Ińakʼ ontor reakʼ jala do ḍher akantińạ; ińakʼ sanam kosṭo khon baṛe rukhiyạyińme.

¹⁸ Ińakʼ duk ar kosṭo secʼ beṅgedme; ar ińakʼ sanam kạiko ikạ kạtińme.

¹⁹ Ńelkom, ińren bạirikoakʼ lekha do tinạkʼ gana; onko do bebạṛicʼko kurudạń kana.

²⁰ Ińakʼ jiwi rukhiyạitińme ar bańcaoińme; ar lajaore alom paṛao ocoyińạ, ente iń do amregeń hirlạ akana.

²¹ Ińakʼ dhorom ar bhage kạmige iń doe rukhiyạyiń ma, ente iń do amregeń bhorsa akana.

²² E Isor, Israelko akoakʼ sanam dukko khon chaḍaokome baṛe.