Sereńko 24 - সান্তালী বাইবেল

Maraṅ raj

¹ Dhạrti ar onare menakʼakʼ jotowakʼge Probhu Isorakʼ kana; Prithimi ar onare tahenko hõ uniren kanako;

² ente unige khạndri dakʼ cetanre ot reakʼ rehetʼe gathaokeda, ar ona ot ar hasa latar reakʼ dakʼ cetanreye sapʼ dohokeda.

³ Probhu Isorakʼ burure dejokʼ lek do cetʼ jãhãe menaea? Uniyakʼ sonot jaegare teṅgokʼ lek doe okoe kana?

⁴ Eken uni kangeae lekicʼ do, okoeyakʼ ti do miridosgetae, ar ontor hõ khạṭigetae, ar eṛeyakʼ secʼ mon hõ bạnukʼtae. Ar mocare eṛe kiriạ hõ bạnukʼtae.

⁵ Uni do Probhu Isor ṭhen khon bhore ńama; ente uni do uniyakʼ sana lekae calakʼ kana ar uniren babańcaoicʼ Isor do onae udukʼaea.

⁶ Nonkan hoṛ do Probhu Isorko sewawaea, onko do uniyakʼ mẽtãhãko ńam bakʼṛa kana ar noko kangeako Jakobren bõsko do. (Sela)

⁷ E nagraha reakʼ phaṭok duạrko, apeakʼ bohokʼ do arhõ rakabtape; E jaejug reakʼ duạrko, apeakʼ silpiń do jhijokʼtapema; ente ṭhonokren raj do bhitriteye bolo lạgidokʼ kana.

⁸ Nui ṭhonokren raj doe okoe kana? Uni doe Probhu Isor kana, uni doe birbão are daṛeangea; Uni Probhu Isorge, okoe do lạṛhạireye birbãoicʼkan.

⁹ E nagraha reakʼ phaṭok duạrko, apeakʼ bohokʼ do arhõ coṭte rakabtape; E jaejugren duạrko, apeakʼ silpiń do purạte jhijtape; ente ṭhonokren raj do bhitriteye bolo lạgidokʼ kana.

¹⁰ Okoe kanae ṭhonokren uni raj do? Uni ṭhonokren raj do sanam daṛean Probhu Isor kanae. (Sela)